കഴിഞ്ഞ ഒരു മാസത്തിലേറെയായി രാജ്യത്തിന്റെ കണ്ണും കാതും അങ്ങ് ഡല്‍ഹിയിലായിരുന്നു. ഇന്നോളം രാജ്യം കാണാത്തത്രയും മനോഹരമായ ഒരു പ്രതിഷേധ സമരത്തിന് സാക്ഷ്യം വഹിക്കുകയായിരുന്നു. കാവ്യാത്മകമായ ആ പ്രക്ഷോഭത്തെ ഹൃദയത്തിലേറ്റി രാജ്യം. കലാപങ്ങളും സംഘര്‍ഷങ്ങളുമില്ലാതെ രാജ്യത്തിന്റെ ചെറുപ്പം തങ്ങളുടെ നിലപാടില്‍ ഉറച്ചു നിന്നപ്പോള്‍ സാക്ഷാല്‍ 'മോദിസര്‍ക്കാറിന്' തലകുനിക്കേണ്ടി വന്നു അവര്‍ക്കു മുന്നില്‍. 

അതിമനോഹരങ്ങളായ രസകരമായ ഒത്തിരി നിമിഷങ്ങളും അനുഭവങ്ങളും സമ്മാനിച്ചാണ് ഈ പ്രക്ഷോഭം അവസാനിക്കുന്നത്. എല്ലാം കഴിഞ്ഞ് പോരാട്ടത്തെ ആഘോഷമാക്കി ആ കുഞ്ഞുങ്ങള്‍ പിരിഞ്ഞു പോയപ്പോള്‍ മുതിര്‍ന്നവര്‍ക്കായി പൗരബോധത്തിന്റെ മറ്റൊരു പാഠം കൂടി പകര്‍ന്നു നല്‍കി അവര്‍. 

സാധാരണയായി ഇത്തരം കൂടിച്ചേരലുകള്‍ അവസാനിക്കുമ്പോള്‍ ചര്‍ച്ച ചെയ്യപ്പെടാതെ പോകുന്ന പലതും ബാക്കി അവിടെ ബാക്കിയാവാറുണ്ട്. പ്ലാസ്റ്റിക് കുപ്പികള്‍ മുതല്‍ ഭക്ഷണ അവശിഷ്ടങ്ങള്‍, പേപ്പര്‍ കപ്പുകള്‍..എന്നിങ്ങനെ ബാനറുകള്‍ വരെ...ഇതെല്ലാം വൃത്തിയാക്കലും ഒഴിവാക്കലുമൊക്കെ പ്രദേശത്തെ ശുചീകരണ തൊഴിലാളികളുടെ പണിയായി മാറുന്നു. 

ALSO READ: ആര്‍.എസ്.എസിന്റെ സ്വന്തം ധര്‍മേന്ദ്ര പ്രധാന്‍; മോദി സര്‍ക്കാറിന്റെ ചരിത്രത്തില്‍ സമരംമൂലം മന്ത്രി രാജിവയ്ക്കുന്നത് ആദ്യം

എന്നാല്‍ ഇവിടേയും മാതൃകയാണ് ഈ ചെറു പിള്ളേര്‍. ചൂലുകള്‍, മാലിന്യം ശേഖരിക്കാനുള്ള പ്ലാസ്റ്റിക് ചാക്കുകളും കയ്യുറകളുമൊക്കെയായി ഒരു സംഘം സമരവേദിയിലെത്തുന്നതാണ് രാവിലെ അവിടത്തുകാര്‍ കാണുന്നത്.  റോഡുകള്‍ തൂത്തുവാരി, മാലിന്യങ്ങള്‍ ശേഖരിച്ചു.  മണിക്കൂറുകള്‍ക്ക് മുന്‍പ് അവര്‍ ഉപയോഗിച്ച പൊതുസ്ഥലം വൃത്തിയാക്കി. അതിനവര്‍ ആരേയും കാത്തുനിന്നില്ല. പ്ലാസ്റ്റിക് മാലിന്യങ്ങളും അല്ലാത്തവയും വേര്‍തിരിച്ചാണ് അവര്‍ വൃത്തിയാക്കിയതെന്ന് ദേശീയ മാധ്യമങ്ങളുടെ റിപ്പോര്‍ട്ട് ചൂണ്ടിക്കാട്ടുന്നു. 

പൊതു സ്ഥലങ്ങള്‍ പൊതു സ്വത്താണ്. എന്നാല്‍ അത് വൃത്തിയായി സൂക്ഷിക്കേണ്ടത് കൂടി നമ്മുടെ കടമയാണെന്നത് നമ്മളില്‍ പലരും മനഃപൂര്‍വ്വം മറക്കാറുണ്ട്. എന്നാല്‍ ഈ കുട്ടികള്‍ അത് മറന്നില്ല.