വഡോദര: ഇന്ത്യക്കെതിരായ വനിതാ ഏകദിന പരമ്പര ആസ്‌ത്രേലിയന്‍ വനിതകള്‍ തൂത്തുവാരി. മൂന്നാം പോരാട്ടത്തില്‍ 97 റണ്‍സിന്റെ വിജയം പിടിച്ചാണ് ഓസീസ് ടീമിന്റെ നേട്ടം.
ആദ്യം ബാറ്റ് ചെയ്ത ഓസീസ് വനിതകള്‍ നിശ്ചിത 50 ഓവറില്‍ 332 റണ്‍സെന്ന കൂറ്റന്‍ സ്‌കോര്‍ നേടിയപ്പോള്‍ ഇന്ത്യയുടെ പോരാട്ടം 44.4 ഓവറില്‍ 235 റണ്‍സില്‍ അവസാനിച്ചു. ജെമിമ റോഡ്രിഗസ് (42), സ്മൃതി മന്ധന (52), ദീപ്തി ശര്‍മ (36), സുഷമ വര്‍മ (30) എന്നിവര്‍ ഇന്ത്യക്കായി പൊരുതിയെങ്കിലും ടീമിനെ അന്തിമ വിജയത്തിലെത്തിക്കാന്‍ ഇവര്‍ക്ക് സാധിച്ചില്ല.
നേരത്തെ അലിസ്സ ഹീലി നേടിയ കന്നി ഏകദിന സെഞ്ച്വറിയുടെ (133) കരുത്തിലാണ് ആസ്‌ത്രേലിയന്‍ വനിതകള്‍ മികച്ച സ്‌കോറിലെത്തിയത്. ഇന്ത്യക്കായി ഹര്‍മന്‍പ്രീത് കൗര്‍ രണ്ട് വിക്കറ്റുകളെടുത്തു.