തിരുവനന്തപുരം: സംസ്ഥാനത്തെ സഹകരണബാങ്കുകളില്‍ ഏകീകൃത സോഫ്റ്റ്‌വെയര്‍ സംവിധാനം സ്ഥാപിക്കുന്നതിന് ഇഫ്താസ് എന്ന കമ്പനിക്ക് കരാര്‍ നല്‍കിയ സര്‍ക്കാര്‍ നടപടിയെ നിയമസഭയില്‍ ചോദ്യം ചെയ്ത് പ്രതിപക്ഷം.
ഇഫ്താസിന് കരാര്‍ നല്‍കിയത് ചട്ടവിരുദ്ധമാണെന്ന് ആരോപിച്ച് പ്രതിപക്ഷം സഭ വിട്ടു. ധനാഭ്യര്‍ഥന ചര്‍ച്ചക്കിടെ പി. ഉബൈദുല്ലയാണ് വിഷയം ചൂണ്ടിക്കാട്ടിയത്. മന്ത്രി കടകംപള്ളി സുരേന്ദ്രന് ഇതിന് വ്യക്തമായ മറുപടി നല്‍കാന്‍ കഴിഞ്ഞില്ല. ഇതോടെ പ്രതിപക്ഷം വാക്കൗട്ട് നടത്തി പ്രതിഷേധിച്ചു.
മറുപടി വേളയില്‍ 'ഉണ്ടയില്ലാവെടി'യെന്ന മന്ത്രിയുടെ മറുപടി വന്നതോടെ പ്രതിപക്ഷ നേതാവ് രമേശ് ചെന്നിത്തല, വി.ഡി സതീശന്‍, റോജി എം. ജോണ്‍, കെ.എസ് ശബരീനാഥന്‍ തുടങ്ങിയവര്‍ രംഗത്തെത്തി.
160കോടിയുടെ കരാര്‍ ടെന്‍ഡര്‍ പോലും ക്ഷണിക്കാതെയാണോ ഒരു കമ്പനിക്ക് നല്‍കിയതെന്ന് പ്രതിപക്ഷം ചോദിച്ചു. പ്രതിപക്ഷം ആവര്‍ത്തിച്ച് ചോദിച്ചിട്ടും ഇതു സംബന്ധിച്ച് വ്യക്തമായ മറുപടി നല്‍കാന്‍ മന്ത്രിക്ക് കഴിഞ്ഞില്ല. റിസര്‍വ് ബാങ്കിന്റെ ഉപകമ്പനിയാണ് ഇഫ്താസ് (ഇന്ത്യന്‍ ഫിനാന്‍ഷ്യല്‍ ടെക്‌നോളജി ആന്‍ഡ് അലൈയ്ഡ് സര്‍വിസസ്) എന്ന് മറുപടി പറഞ്ഞ മന്ത്രി, ഇക്കാര്യത്തില്‍ നടപടി പുരോഗമിക്കുന്നതേയുള്ളൂവെന്നും ഒഴുക്കന്‍ മട്ടില്‍ മറുപടി നല്‍കി.
റിസര്‍വ് ബാങ്കിന്റെ ഉപകമ്പനിയാണെങ്കിലും ടെന്‍ഡറില്ലാതെ കരാര്‍ നല്‍കാമോയെന്ന ചോദ്യം വന്നതോടെ മന്ത്രിക്ക് ഉത്തരം മുട്ടി. ഗവണ്‍മെന്റിന്റെ നടപടി സംശയകരമാണെന്നും മന്ത്രിയുടെ മറുപടിയില്‍ അവ്യക്തതയുണ്ടെന്നും ചെന്നിത്തല ആരോപിച്ചു.
രേഖകള്‍ സഹിതം അടുത്തദിവസം മറുപടി പറയാമെന്ന് നിര്‍ദേശിച്ച് സ്പീക്കറും വിഷയത്തില്‍ ഇടപെട്ടു. കരാറിലെ സംശയങ്ങള്‍ പോലും ദൂരീകരിക്കാന്‍ മന്ത്രിക്ക് കഴിയുന്നില്ലെന്നു ആരോപിച്ച് പ്രതിപക്ഷം സഭയില്‍നിന്ന് ഇറങ്ങിപ്പോവുകയായിരുന്നു. പ്രതിപക്ഷം സഭ വിട്ടശേഷം മുഖ്യമന്ത്രി ഇക്കാര്യത്തില്‍ വിശദീകരണം നടത്തി.
പ്രതിപക്ഷം പുകമറ സൃഷ്ടിക്കാനാണ് ശ്രമിക്കുന്നതെന്ന് മറുപടി പറഞ്ഞ മുഖ്യമന്ത്രി, റിസര്‍വ് ബാങ്കിന്റെ സബ്‌സിഡ്യറി കമ്പനിയായ ഐ.ഡി.ആര്‍.ബി.ടി (ഇന്‍സ്റ്റിറ്റ്യൂട്ട് ഫോര്‍ ഡെവലപ്‌മെന്റ് ആന്‍ഡ് റിസര്‍ച്ച് ഇന്‍ ബാങ്കിങ് ടെക്‌നോളജി)ക്ക് കീഴിലുള്ള കമ്പനിയാണ് ഇഫ്താസ് എന്നും കൂട്ടിച്ചേര്‍ത്തു.
സഹകരണ ബാങ്കുകളില്‍ ഏകീകൃത സോഫ്റ്റ്‌വെയര്‍ സംവിധാനം സ്ഥാപിക്കാനുള്ള നബാര്‍ഡിന്റെ പദ്ധതി വൈകുമെന്ന പേരിലാണ് സംസ്ഥാനം സ്വന്തമായി മുന്നോട്ടുപോയതെന്ന് പിന്നീട് നടത്തിയ വാര്‍ത്താസമ്മേളനത്തില്‍ രമേശ് ചെന്നിത്തല പറഞ്ഞു. കമ്പനിയെ തെരഞ്ഞെടുക്കുന്നതില്‍ സര്‍ക്കാര്‍ നടപടിക്രമങ്ങള്‍ പാലിച്ചില്ലെന്നും ചെന്നിത്തല പറഞ്ഞു. പ്രതിപക്ഷ ഉപനേതാവ് എം.കെ മുനീര്‍, വി.ഡി സതീശന്‍, അനൂപ് ജേക്കബ് എന്നിവരും പങ്കെടുത്തു.