തൃക്കരിപ്പൂര്‍: വിവിധ സ്‌കൂളുകളില്‍നിന്നു വിരമിക്കുന്ന അധ്യാപകര്‍ക്ക് കേരളാ പ്രദേശ് സ്‌കൂള്‍ ടീച്ചേഴ്‌സ് അസോസിയേഷന്‍ ചെറുവത്തൂര്‍ ഉപജില്ലാ കമ്മിറ്റിയുടെ നേതൃത്വത്തില്‍ യാത്രയയപ്പ് നല്‍കി.
ഹരിതവിദ്യാലയം റിയാലിറ്റി ഷോയില്‍ സംസ്ഥാന തലത്തില്‍ മൂന്നാം സ്ഥാനം നേടിയ ചന്തേര ഇസ്സത്തുല്‍ ഇസ്്‌ലാമിയ എ.എല്‍.പി. സ്‌കൂളിനും ഫൈനല്‍ റൗണ്ടില്‍ എത്തിയ ഉദിനൂര്‍ ഹയര്‍ സെക്കന്‍ഡറി സ്‌കൂള്‍, ഉദിനൂര്‍ എ.യു.പി സ്‌കൂള്‍ എന്നിവയ്ക്കും ഉപഹാര സമര്‍പ്പണം നടത്തി. കെ.പി.എസ്.ടി.എ സംസ്ഥാന കമ്മിറ്റി അംഗം ടി.എം സദാനന്ദന്‍ ഉദ്ഘാടനം ചെയ്തു. ഉപജില്ലാ പ്രസിഡന്റ് കെ. ശ്രീനിവാസന്‍ അധ്യക്ഷനായി.
സംസ്ഥാന കമ്മിറ്റി അംഗം പി. ശശിധരന്‍ വിരമിക്കുന്ന അധ്യാപകര്‍ക്കുള്ള ഉപഹാര സമര്‍പ്പണം നടത്തി. ജില്ലാ പ്രസിഡന്റ് കുഞ്ഞിക്കണ്ണന്‍ കരിച്ചേരി മുഖ്യ പ്രഭാഷണം നടത്തി. ജി.കെ ഗിരീഷ്, പി. രാമചന്ദ്രന്‍ അടിയോടി, ഗിരിജ, ജി.കെ.പി ഗോപാലകൃഷണന്‍, ഉപജില്ലാ സെക്രട്ടറി കെ.വി വിനോദ്, കെ. രാജേഷ് കുമാര്‍ സംസാരിച്ചു.