സിഡ്‌നി: ജൂനിയര്‍ ലോകകപ്പ് ഷൂട്ടിങ് പോരാട്ടത്തില്‍ ഇന്ത്യക്ക് രണ്ട് വെങ്കല മെഡല്‍ കൂടി. ഇന്ത്യന്‍ കൗമാര താരം വിവാന്‍ കപൂറാണ് പുരുഷ വിഭാഗം ട്രാപില്‍ വ്യക്തിഗത വിഭാഗത്തിലും ടീമിനത്തിലും വെങ്കലം വെടിവച്ചിട്ടത്. ടീമിനത്തില്‍ വിവാന്‍, ലക്ഷയ് ഷിയോറന്‍, അലി അമന്‍ ഇലാഹി എന്നിവരടങ്ങിയ ടീമാണ് വെങ്കലം സ്വന്തമാക്കിയത്. ഇതോടെ ടൂര്‍ണമെന്റിലെ ഇന്ത്യയുടെ മൊത്തം മെഡല്‍ സമ്പാദ്യം അഞ്ചായി മാറി. രണ്ട് സ്വര്‍ണവും മൂന്ന് വെങ്കലവുമാണ് ഇന്ത്യയുടെ സമ്പാദ്യം.