ബംഗളൂരു: കര്‍ണാടക നിയമസഭാ തെരഞ്ഞെടുപ്പില്‍ കോണ്‍ഗ്രസിന് മുന്‍തൂക്കമെന്ന ബി.ജെ.പി സര്‍വേ ഫലത്തിനുപിന്നാലെ സി-ഫോര്‍ നടത്തിയ സര്‍വേയും കോണ്‍ഗ്രസിന് അനുകൂലം.
മാര്‍ച്ച് ഒന്നുമുതല്‍ 25 വരെ നടത്തിയ സര്‍വേയില്‍ 154 നിയമ സഭാ മണ്ഡലത്തിലെ 22,357 വോട്ടര്‍മാരെ സന്ദര്‍ശിച്ചാണ് സി-ഫോര്‍ റിപ്പോര്‍ട്ട് തയാറാക്കിയത്. 366 നഗരപ്രദേശങ്ങളിലേയും 977 ഗ്രാമീണ മേഖലകളിലേയും 2368 പോളിങ് ബൂത്തുകളും സര്‍വേക്കായി തെരഞ്ഞെടുത്തിരുന്നു.
2013ല്‍ സി-ഫോര്‍ നടത്തിയ സര്‍വേയില്‍ കോണ്‍ഗ്രസിന് 119-120 സീറ്റുകള്‍ ലഭിക്കുമെന്ന് പറഞ്ഞിരുന്നു. 122 സീറ്റില്‍ വിജയിച്ച് കോണ്‍ഗ്രസ് അധികാരത്തിലേറി.
ഇത്തവണ കോണ്‍ഗ്രസിന്റെ വോട്ടിങ് 9 ശതമാനം കണ്ട് ഉയരുമെന്നും സി-ഫോര്‍ പറയുന്നു. കോണ്‍ഗ്രസിന്റെ വോട്ടുവിഹിതം 46 ശതമാനമാകുമ്പോള്‍ ബി.ജെ.പി നിലവാരം മെച്ചപ്പെടുത്തി 31 ശതമാനത്തിലേക്ക് ഉയരും. എന്നാല്‍ ജെ.ഡി.എസിന്റെ നില കൂടുതല്‍ പരുങ്ങലിലാകുമെന്നാണ് വിലയിരുത്തല്‍ അവരുടെ വോട്ടിങ് ശതമാനം 16 ശതമാനം മാത്രമായിരിക്കും.
തെരഞ്ഞെടുപ്പില്‍ 126 സീറ്റുകള്‍ നേടി കോണ്‍ഗ്രസ് ഭരണം നിലനിര്‍ത്തുമ്പോള്‍ ബി.ജെ.പിക്ക് 70 സീറ്റുകളും ജെ.ഡി.എസ് 27 സീറ്റുകളിലേക്ക് ചുരുങ്ങുമെന്നും പറയുന്നു.
കഴിഞ്ഞ തെരഞ്ഞെടുപ്പില്‍ ജെ.ഡി.എസിന് 40 സീറ്റുകളാണ് ഉണ്ടായിരുന്നത്.
മുഖ്യമന്ത്രി സ്ഥാനാര്‍ഥിയായി ഏറ്റവും അനുയോജ്യനായി ജനങ്ങള്‍ പരിഗണിക്കുന്നത് സിദ്ധരാമയ്യയെ തന്നെയാണ്.
45 ശതമാനം ജനങ്ങളും അദ്ദേഹത്തിനെ പിന്തുണക്കുമ്പോള്‍, 26 ശതമാനം പേര്‍മാത്രമാണ് ബി.ജെ.പിയുടെ മുഖ്യമന്ത്രി സ്ഥാനാര്‍ഥിയായ യദ്യൂരപ്പയെ പിന്തുണക്കുന്നത്. 13 ശതമാനം പേര്‍ ജെ.ഡി.എസ് നേതാവ് എച്ച്. ഡി കുമാരസ്വാമിയെ ആണ് പരിഗണിക്കുന്നത്.