കൊച്ചി: നടന്‍ ദിലീപിന്റെ ഡി സിനിമാസ് ഭൂമി കയ്യേറ്റം നടത്തിയെന്ന പരാതിയില്‍ എഫ്.ഐ.ആര്‍ രജിസ്റ്റര്‍ ചെയ്യാന്‍ വൈകിയതില്‍ വിജിലന്‍സ് ഉദ്യോഗസ്ഥര്‍ക്ക് കോടതിയുടെ വിമര്‍ശനം. തൃശ്ശൂര്‍ വിജിലന്‍സ് കോടതിയാണ് ഉദ്യോഗസ്ഥരെ വിമര്‍ശിച്ചത്. എഫ്.ഐ.ആര്‍ രജിസ്റ്റര്‍ ചെയ്യാന്‍ കോടതി ഒരാഴ്ച കൂടി സമയം അനുവദിച്ചു.

രണ്ടാഴ്ച മുമ്പാണ് ഡി സിനിമാസുമായി ബന്ധപ്പെട്ട പരാതിയില്‍ കേസ് എടുത്ത് അന്വേഷണം നടത്താന്‍ കോടതി നിര്‍ദേശിച്ചത്. സംഭവത്തില്‍ നടന്‍ ദിലീപിന് പുറമേ മുന്‍ ജില്ലാ കലക്ടര്‍ എം.എസ് ജയയെയും എതിര്‍കക്ഷിയാക്കി പൊതുപ്രവര്‍ത്തകനായ പി.ഡി ജോസഫ് തൃശ്ശൂര്‍ വിജിലന്‍സ് കോടതിയില്‍ പരാതി നല്‍കിയിരുന്നു. പരാതിയുടെ അടിസ്ഥാനത്തില്‍ പ്രാഥമിക അന്വേഷണം നടത്തിയെങ്കിലും കയ്യേറ്റം നടന്നിട്ടില്ലെന്ന നിലപാടായിരുന്നു വിജിലന്‍സ് ആദ്യം സ്വീകരിച്ചത്.