നിലമ്പൂര്‍: മമ്പാട് പഞ്ചായത്തില്‍ നറുക്കെടുപ്പിലൂടെ എല്‍.ഡി.എഫിനി പ്രസിഡന്റ് സ്ഥാനം സ്വന്തമായി. സി.പി.എമ്മിലെ ഷിഫ്‌ന നജീബാണ് നറുക്കെടുപ്പിലൂടെ പ്രസിഡന്റ് പദവിയിലേക്കെത്തിയത്. മുസ്‌ലിം ലീഗിലെ കാഞ്ഞിരാല സെമീനയായിരുന്നു എതിര്‍ സ്ഥാനാര്‍ഥി. വരണാധികാരിയായ ജില്ലാ സര്‍വേ സൂപ്രണ്ട് കെ.കെ രാജുവിന്റെ നേതൃത്വത്തില്‍ ഇന്നലെ രാവിലെ പതിനൊന്നിനു ഗ്രാമപഞ്ചായത്ത് ഓഫിസിലായിരുന്നു നറുക്കെടുപ്പ്.
ഗ്രാമപഞ്ചായത്ത് പ്രസിഡന്റായിരുന്ന ലീഗിലെ കണ്ണിയന്‍ റുഖിയ പാര്‍ട്ടി ധാരണപ്രകാരം രാജിവച്ച ഒഴിവിലേക്കാണ് എല്‍.ഡി.എഫിന് അപ്രതീക്ഷിത വിജയം നേടാനായത്. കഴിഞ്ഞ മാസം 26നു പ്രസിഡന്റ് തെരഞ്ഞെടുപ്പ് നടത്തിയെങ്കിലും ലീഗ് അംഗത്തിന്റെ വോട്ട് അസാധുവായിരുന്നു. ഇതോടെ 19 അംഗ ബോര്‍ഡില്‍ ഇരുപക്ഷത്തിനും ഒന്‍പതു വീതം വോട്ട് ലഭിച്ചു. തുടര്‍ന്നു നറുക്കെടുപ്പിലേക്കു നീങ്ങുന്നതിനിടെ സംഘര്‍ഷമുണ്ടാകുകയും നറുക്കെടുപ്പ് മാറ്റിവയ്ക്കുകയുമായിരുന്നു.
മാറ്റിവച്ച നറുക്കെടുപ്പാണ് ഇന്നലെ നടന്നത്. പഞ്ചായത്തിലെ എട്ടാം വാര്‍ഡായ പുളിക്കലൊടിയില്‍നിന്ന് അഞ്ചു വോട്ടിന്റെ ഭൂരിപക്ഷത്തിനാണ് ഷിഫ്‌ന നജീബ് തെരഞ്ഞെടുക്കപ്പെട്ടിരുന്നത്. ഇവര്‍ ആദ്യമായാണ് പഞ്ചായത്തംഗമാകുന്നത്. സി.പി.എം മമ്പാട് ലോക്കല്‍ കമ്മിറ്റി അംഗം, കേരളാ കര്‍ഷകത്തൊഴിലാളി യൂനിയന്‍ ജില്ലാ കമ്മിറ്റി അംഗം, ജനാധിപത്യ മഹിളാ അസോസിയേഷന്‍ വണ്ടൂര്‍ ഏരിയാ കമ്മിറ്റി അംഗം, ഡി.വൈ.എഫ്.ഐ വണ്ടൂര്‍ ബ്ലോക്ക് കമ്മിറ്റി അംഗം എന്നീ നിലകളില്‍ പ്രവര്‍ത്തിച്ചുവരുന്നു. ഇവര്‍ ഇന്നലെതന്നെ സത്യപ്രതിജ്ഞ ചെയ്ത് അധികാരമേറ്റു.