നീലേശ്വരം: വിഷു വിപണി ലക്ഷ്യമിട്ട് ഫ്രണ്ട്‌സ് നവോദയ നഗര്‍ കൃഷിയിറക്കിയ കണിവെള്ളരിയില്‍ നൂറുമേനി വിളവ്. ബിരിക്കുളം നവോദയ നഗര്‍ ഫ്രണ്ട്‌സ് പുരുഷ സ്വയം സഹായ സംഘത്തിന്റെ വെള്ളരി കൃഷിയിലാണ് നൂറുമേനി വിളവു ലഭിച്ചത്.
ഇതുവരെയായി ഇവര്‍ 15 ക്വിന്റല്‍ വെള്ളരി വിപണിയിലെത്തിച്ചു കഴിഞ്ഞു. കൃഷിഭവന്റെ കീഴിലുള്ള ബിരിക്കുളം ക്ലസ്റ്ററില്‍ രജിസ്റ്റര്‍ ചെയ്ത സംഘമാണിത്.
ബിരിക്കുളം വയലിലെ 50 സെന്റ് സ്ഥലത്താണ് ഇവര്‍ വെള്ളരി നട്ടത്. ഇതിനു പുറമേ മത്തന്‍, പയര്‍, ചീര, വെണ്ട, വഴുതന എന്നിവയും കൃഷി ചെയ്തിരുന്നു. ആകെ ഒരേക്കര്‍ സ്ഥലത്തായിരുന്നു ഇവരുടെ പച്ചക്കറി കൃഷി. ആദ്യമായാണ് ഇവര്‍ സംഘകൃഷി ചെയ്യുന്നത്.
എം. ശശിധരന്‍, സി.കെ ഗംഗാധരന്‍, കെ. രാജന്‍, എം. ധനേഷ്, എ.പി സുമിത്ത് കുമാര്‍, എം. ഗോവിന്ദന്‍, എം. ബാബു, സിനു കൂടോല്‍, എ.പി സജിത്ത് കുമാര്‍ എന്നിവരാണ് സംഘാംഗങ്ങള്‍.