ചെറുവത്തൂര്‍: ജില്ലയില്‍ അടിപ്പാതകള്‍ നിര്‍മിക്കുന്നത് പാഴ്‌വേലയാകുമെന്നു റെയില്‍വേ നേരത്തെ മുന്നറിയിപ്പു നല്‍കിയിരുന്നതായി പി. കരുണാകരന്‍ എം.പി. അടിപ്പാത അനുയോജ്യമല്ലെന്നു റെയില്‍വേ അറിയിച്ച പ്രദേശങ്ങളില്‍ നിര്‍ബന്ധപൂര്‍വം അടിപ്പാത നിര്‍മിച്ചതുകാരണമാണ് അവ ഉപയോഗശൂന്യമായതെന്നും അദ്ദേഹം പറഞ്ഞു. ചെറുവത്തൂര്‍ റെയില്‍വേ സ്റ്റേഷനില്‍ വിശ്രമമുറി ഉദ്ഘാടനം ചെയ്യവേയാണ് അദ്ദേഹം ഇങ്ങനെ പറഞ്ഞത്.
നിലവില്‍ റെയില്‍വേ അടിപ്പാതകള്‍ നിര്‍മിച്ചു തൃക്കരിപ്പൂര്‍, ചന്തേര, ചെറുവത്തൂര്‍ എന്നിവിടങ്ങളില്‍ കോടികളാണ് പാഴാക്കി കളഞ്ഞത്. അടിപ്പാത പണിതില്ലെങ്കില്‍ തെരഞ്ഞെടുപ്പില്‍ വോട്ടു ചെയ്യില്ലെന്ന രീതിയില്‍ ഉള്‍പ്പെടെ ജനവികാരം ഉയര്‍ന്നു. ഇതിനു ശേഷമാണു ചെന്നൈയില്‍ പോയി നിര്‍ബന്ധപൂര്‍വം പാതകള്‍ പാസാക്കിയെടുത്തത്. റെയില്‍വേ ചൂണ്ടിക്കാണിക്കുന്ന കാര്യങ്ങള്‍ ഉള്‍ക്കൊണ്ടില്ലെങ്കില്‍ പണം നഷ്ടമാകുമെന്നും എം.പി പറഞ്ഞു.
ഉദ്ഘാടനം കഴിഞ്ഞു നാലു വര്‍ഷമായിട്ടും ചന്തേര റെയില്‍വേ അടിപ്പാത ഉപയോഗശൂന്യമായി കിടക്കുകയാണ്. വെള്ളക്കെട്ടു കാരണം ഒന്നരക്കോടി മുതല്‍ മുടക്കി നിര്‍മിച്ച അടിപ്പാത ഇതുവരെ ജനങ്ങള്‍ക്ക് ഉപകാരപ്പെട്ടിട്ടില്ല. വെള്ളം നിറഞ്ഞു ഗതാഗതം അസാധ്യമായ ചന്തേര റെയില്‍വേ അടിപ്പാത ഉപയോഗയോഗ്യമാക്കുന്നതിനെ കുറിച്ചുപഠിക്കാന്‍ ഉദ്യോഗസ്ഥ സംഘവും എത്തിയിരുന്നു. അടിപ്പാതയില്‍ വേനലിലും വര്‍ഷത്തിലും വെള്ളം കെട്ടിക്കിടക്കുന്നതിനാല്‍ ഈ വഴി വാഹനങ്ങള്‍ക്കു കടന്നുപോകാന്‍ കഴിയുന്നില്ല. മൂന്നു കോടി രൂപ ചെലവിട്ടു നിര്‍മിച്ച തൃക്കരിപ്പൂര്‍ ഇളമ്പച്ചി-തലിച്ചാലം റെയില്‍വേ അടിപ്പാതയില്‍ മഴക്കാലത്ത് ഗതാഗത തടസം പതിവാണ്.