വണ്ടൂര്‍: ജിദ്ദയില്‍നിന്ന് വാണിയമ്പലം സ്വദേശിയുടെ 85 ലക്ഷം രൂപ തട്ടിയെടുത്ത് മുങ്ങിയ കേസില്‍ ഒരാള്‍ പിടിയിലായി. കണ്ണമംഗലം കുന്നുംപുറം ഏക്കാപറമ്പ് സ്വദേശി പട്ടര്‍ക്കടവന്‍ മുഹമ്മദലി (50) യെയാണ് വണ്ടൂര്‍ സി.ഐ വി.ബാബുരാജ് അറസ്റ്റ് ചെയ്തത്. ഖത്തറിലേക്ക് രക്ഷപ്പെടാന്‍ ശ്രമിക്കുന്നതിനിടെ നെടുമ്പാശ്ശേരി വിമാനത്താവളത്തില്‍വച്ചാണ് ഇയാള്‍ പിടിയിലാകുന്നത്.
ജിദ്ദയില്‍ ബന്ധുവുമൊത്ത് സൂപ്പര്‍ മാര്‍ക്കറ്റ് നടത്തിവരുന്ന വാണിയമ്പലം തച്ചംകോട് സ്വദേശിയുടെ പരാതിയിലാണ് അറസ്റ്റ്. ബാങ്കിലടക്കാനും, ബിസിനസുമായി ബന്ധപ്പെട്ട സ്ഥാപനങ്ങള്‍ക്കും വ്യക്തികള്‍ക്കും നല്‍കാനുമായി മുഹമ്മദലിയെഏല്‍പ്പിച്ച 85 ലക്ഷം രൂപയോളം വരുന്ന 495000 സൗദി റിയാല്‍ പ്രതി വിശ്വാസ വഞ്ചന ചെയ്ത് സഹായികളുമായി പങ്കിട്ടെടുക്കുകയും ഇന്ത്യയിലേക്ക് കടക്കുകയുമായിരുന്നു.
മാര്‍ച്ച് 23ന് മുംബൈയിലെത്തിയ മുഹമ്മദലി തുടര്‍ന്ന് ബംഗളുരു,കൊല്‍ക്കത്ത എന്നിവിടങ്ങളില്‍ ആഡംബരത്തോടെ കഴിയുകയായിരുന്നു. വിദേശത്തേക്ക് കടക്കാനുള്ള സാധ്യത മുന്നില്‍ കണ്ട് പൊലിസ് ഇയാള്‍ക്കെതിരെ ലൂക്ക് ഔട്ട് സര്‍ക്കുലര്‍ ഇറക്കിയിരുന്നു. കഴിഞ്ഞ ദിവസം പുലര്‍ച്ചെ നെടുമ്പാശ്ശേരി വിമാനത്താവളം വഴി ഖത്തറിലേക്ക് രക്ഷപ്പെടാന്‍ ശ്രമിക്കുന്നതിനിടെ എമിഗ്രേഷന്‍ വിഭാഗം തടഞ്ഞുവയ്ക്കുകയും വണ്ടൂര്‍ പൊലിസിനെ വിവരമറിയിക്കുകയുമായിരുന്നു.
തുടര്‍ന്ന് വണ്ടൂരിലെത്തിച്ച് പ്രാഥമികമായി ചോദ്യം ചെയ്തതിന് ശേഷമാണ് പൊലിസ് അറസ്റ്റ് രേഖപ്പെടുത്തിയത്. കൂട്ടുപ്രതികളായ മേലാറ്റൂര്‍, കണ്ണമംഗലം സ്വദേശികളായ രണ്ടു പേര്‍ക്കെതിരെ പൊലിസ് അന്വേഷണമാരംഭിച്ചിട്ടുണ്ട്. പെരിന്തല്‍മണ്ണ ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
സി.ഐ വിബാബുരാജ്, എസ്.ഐ പി.ചന്ദ്രന്‍, എ.എസ്.ഐ കെ സത്യന്‍ എന്നിവരുടെ നേതൃത്വത്തിലുള്ള സംഘമാണ് അന്വേഷണം നടത്തുന്നത്.