തിരുവനന്തപുരം: ലോക കേരളസഭയുടെ രണ്ടാം സമ്മേളനം ആഡംബരത്തിന്റെയും ധൂര്‍ത്തിന്റെയും സമ്മേളനമായതു കൊണ്ടാണ് പ്രതിപക്ഷം ബഹിഷ്‌കരിച്ചതെന്നു കെ.പി.സി.സി മുന്‍ പ്രസിഡന്റ് എം.എം ഹസ്സന്‍. കേരള പ്രദേശ് പ്രവാസി കോണ്‍ഗ്രസ് സെക്രട്ടേറിയറ്റിന് മുന്നില്‍ സംഘടിപ്പിച്ച കൂട്ടധര്‍ണ ഉദ്ഘാടനം ചെയ്യുകയിരുന്നു അദ്ദേഹം.
പ്രവാസികളുടെ പ്രശ്‌നങ്ങള്‍ക്ക് പരിഹാരമുണ്ടാക്കാനും അവരുടെ അനുഭവ സമ്പത്ത് സംസ്ഥാനത്തിന്റെ വികസനത്തിന് പ്രയോജനപ്പെടുത്താനുമാണ് ലോക കേരളസഭ രണ്ടു വര്‍ഷം മുന്‍പ് സമ്മേളിച്ചത്. എല്ലാവരും സഹകരിച്ച് നടത്തിയ ആ സമ്മേളനം കൈക്കൊണ്ട ഒരു തീരുമാനംപോലും നടപ്പാക്കാതെ രണ്ടാം വര്‍ഷം നടത്തുന്ന ലോക കേരള സഭയ്ക്ക് സര്‍ക്കാര്‍ 25 കോടി രൂപയെങ്കിലും ചിലവാക്കും. രണ്ടു ദിവസത്തെ സമ്മേളനം നടത്താന്‍ മാത്രം നിയമസഭയിലെ ഹാള്‍ പൊളിച്ചു പണിയാന്‍ 16.5 കോടി രൂപ ചിലവാക്കിക്കഴിഞ്ഞു. സമ്മേളനത്തിന് ഇനിയും ഏഴെട്ടു കോടിയെങ്കിലും ചിലവാകും. ഈ തുക പ്രവാസി ക്ഷേമത്തിനു ചിലവാക്കിയിരുന്നെങ്കില്‍ അതുകൊണ്ട് സാധാരണ പ്രവാസികള്‍ക്ക് പ്രയോജനമുണ്ടാകുമായിരുന്നു.
കഴിഞ്ഞ ലോക കേരളസഭയുടെ ആഹ്വാനം സ്വീകരിച്ച് കേരളത്തില്‍ നിക്ഷേപം നടത്തിയ സംരംഭകരായ പുനലൂരിലെ സുഗതന്റെയും, ആന്തൂരിലെ സാജന്‍ പാറയിലിന്റെയും ആത്മഹത്യയ്ക്കും ഉത്തരവാദി കേരള സര്‍ക്കാര്‍ ആണ്. മരണശേഷം പോലും ഈ പ്രവാസികളുടെ കുടുംബത്തിനു നീതി നല്‍കിയിട്ടില്ലെന്നും ഹസ്സന്‍ പറഞ്ഞു.
പ്രവാസി കോണ്‍ഗ്രസ് സംസ്ഥാന പ്രസിഡന്റ് ഐസക്ക് തോമസ് അധ്യക്ഷനായി. തമ്പാനൂര്‍ രവി, എം. വിന്‍സെന്റ് എം.എല്‍.എ സംസാരിച്ചു.