കൊണ്ടോട്ടി:ഹര്‍ത്താല്‍ ദിനത്തില്‍ വാഴയൂര്‍ കാരാട് അങ്ങാടിയില്‍ അക്രമം നടത്തിയ രണ്ടു യുവാക്കളെ വാഴക്കാട് പൊലിസ് അറസ്റ്റു ചെയ്തു. മേലേപുതുക്കോട് തെഞ്ചീരി പള്ളിയാളി വിബീഷ് (28), കക്കോവ് സ്വദേശി ജ്യോതിഷ് (30) എന്നിവരാണ് അറസ്റ്റിലായത്. കോടതിയില്‍ ഹാജരാക്കിയ ഇരുവരെയും റിമാന്‍ഡ് ചെയ്തു. കാരാടില്‍ വ്യാഴാഴ്ച രാവിലെ കടകള്‍ക്ക് നേരെയുണ്ടായ അക്രമം തടയുന്നതിനിടെയുണ്ടായ വാഴക്കാട് എസ്.ഐ വിജയരാജനടക്കം അഞ്ചു പൊലിസുകാര്‍ക്ക് പരുക്കേറ്റിരുന്നു.
സംഭവത്തില്‍ പൊലിസ് സ്വമേധയാ കേസെടുക്കുകയും വ്യാപാരികള്‍ പരാതി നല്‍കുകയും ചെയ്തിട്ടുണ്ട്. കണ്ടാലറിയാവുന്ന അന്‍പതോളം പേര്‍ക്കെതിരെയാണ് പൊലിസ് കേസെടുത്തത്. സംഭവസ്ഥലത്തെ വീഡിയോ ദൃശ്യങ്ങള്‍ പരിശോധിച്ചുവരികയാണെന്നും കൂടുതല്‍ പേര്‍ പിടിയിലാകുമെന്നും എസ്.ഐ വിജയരാജന്‍ പറഞ്ഞു.