കോട്ടയം: സൗജന്യ റേഷന്‍ നിര്‍ത്തലാക്കാനുള്ള സംസ്ഥാന സര്‍ക്കാരിന്റെ നീക്കം പുനപരിശോധിക്കണമെന്ന് ഓള്‍ ഇന്ത്യാ റേഷന്‍ ഡീലേഴ്‌സ് അസോസിയേഷന്‍ സംസ്ഥാന പ്രസിഡന്റ് കെ. അരവിന്ദാക്ഷന്‍, ദേശീയ ജനറല്‍ സെക്രട്ടറി ബേബിച്ചന്‍ മുക്കാടന്‍ എന്നിവര്‍ ആവശ്യപ്പെട്ടു. ഭക്ഷ്യഭദ്രതാ നിയമപ്രകാരം ലഭിക്കുന്ന റേഷന്റെ വില ജൂലൈ ഒന്നു മുതല്‍ വര്‍ധിപ്പിക്കാനുള്ള കേന്ദ്ര നടപടിയും പുനപരിശോധനയ്ക്ക് വിധേയമാക്കണമെന്നും ഭാരവാഹികള്‍ പറഞ്ഞു. കോട്ടയത്ത് പത്രസമ്മേളനത്തില്‍ സംസാരിക്കുകയായിരുന്നു അവര്‍. റേഷന്‍ ഭക്ഷ്യധാന്യത്തിന്റെ വില വര്‍ധിപ്പിക്കാനുള്ള നീക്കത്തിനെതിരേ ഏപ്രില്‍ മൂന്നിന് ഇന്ത്യയിലെ അഞ്ചര ലക്ഷം റേഷന്‍കടകള്‍ അടച്ചിട്ട് അഖിലേന്ത്യാ പണിമുടക്ക് നടത്തുമെന്ന് ഭാരവാഹികള്‍ അറിയിച്ചു. ഭക്ഷ്യ ഭദ്രതാ നിയമമനുസരിച്ച് മൂന്നു രൂപ നിരക്കില്‍ അരിയും, രണ്ടു രൂപ നിരക്കില്‍ ഗോതമ്പും മൂന്നു വര്‍ഷത്തേക്ക് മാത്രമേ നല്‍കുകയുള്ളൂവെന്ന് കേന്ദ്രം 2013 ല്‍ പാസാക്കിയ നിയമത്തില്‍വ്യക്തമാക്കുന്നു. എന്നാല്‍ കാലാവധി കഴിഞ്ഞതിനാല്‍ ജൂലൈ മുതല്‍ വില വര്‍ധിപ്പിക്കുമെന്ന് ഇപ്പോള്‍ മുന്നറിയിപ്പ് നല്‍കിയിരിക്കുന്നു. കേന്ദ്രം വില വര്‍ധിപ്പിച്ചാല്‍ കേരളം മൂന്നു രൂപയുടെ അരി എട്ടു രൂപയ്ക്ക് നല്‍കേണ്ടി വരുമെന്നും ഭാരവാഹികള്‍ ആരോപിച്ചു.