ഫൈസാബാദ്: പട്ടിക്കാട് ജാമിഅ നൂരിയ്യ അറബിയ്യയുടെ 57ാം വാര്‍ഷിക 55ാം സനദ്ദാന സമ്മേളനത്തോടനുബന്ധിച്ച് നടന്ന സംസ്ഥാനതല ദര്‍സ് ഫെസ്റ്റില്‍ ജൂനിയര്‍, സീനിയര്‍ വിഭാഗങ്ങളില്‍ കോടങ്ങാട് ദര്‍സ് ചാംപ്യന്‍മാരായി. ജൂനിയര്‍, സീനിയര്‍ വിഭാഗത്തില്‍ മലപ്പുറം ആലത്തൂര്‍പടി ദര്‍സ് രണ്ടാം സ്ഥാനം കരസ്ഥമാക്കി. സീനിയര്‍ വിഭാഗത്തില്‍ കാസര്‍കോട് നായന്‍മാര്‍മൂല ദര്‍സും ജൂനിയര്‍ വിഭാഗത്തില്‍ മൂന്നിയൂര്‍ മുട്ടിച്ചിറ ശുഹദാപള്ളി ദര്‍സും മൂന്നാം സ്ഥാനം നേടി. സീനിയര്‍ വിഭാഗത്തില്‍ 26 പോയിന്റോടെ ത്വല്‍ഹത് എ.പി (തെയ്യോട്ട്ചിറ ദര്‍സ്), ജൂനിയര്‍ വിഭാഗത്തില്‍ 41 പോയിന്റോടെ ഹാഫിള് മുഹമ്മദ് ഖളിര്‍ (കോടങ്ങാട് ദര്‍സ്) കലാപ്രതിഭകളായി തെരഞ്ഞെടുക്കപ്പെട്ടു.
രണ്ട് ദിവസങ്ങളിലായി ജൂനിയര്‍,സീനിര്‍ വിഭാഗത്തില്‍ 11 വേദികളിലായി 60 ഇനങ്ങളില്‍ മത്സങ്ങള്‍ നടന്നു. ജില്ലാ, മേഖലാ തലങ്ങളില്‍ യോഗ്യത നേടിയ ആയിരത്തോളം വിദ്യാര്‍ഥികളാണ് വേദികളില്‍ മാറ്റുരച്ചത്.അവാര്‍ഡ് സെഷന്‍ മലപ്പുറം ജില്ലാ കലക്ടര്‍ ജാഫര്‍ മാലിക് ഉദ്ഘാടനം ചെയ്തു. മഞ്ഞളാംകുഴി അലി എം.എല്‍.എ അധ്യക്ഷനായി. സമസ്ത ജന. സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍ അവാര്‍ഡ് ദാനം നിര്‍വഹിച്ചു. സയ്യിദ് സാദിഖലി ശിഹാബ് തങ്ങള്‍, ഖാദര്‍ ഫൈസി കുന്നുംപുറം, മുഹമ്മദലി ഹാജി തൃക്കടീരി, അസ്ഗറലി ഫൈസി പട്ടിക്കാട് പ്രസംഗിച്ചു.