കോഴിക്കോട്: അനേകം സ്ഥാപനങ്ങളുടെ മേധാവിയും ചന്ദ്രിക ദിനപത്രത്തിന്റെ ഡയറക്ടറുമായിരുന്ന എം.കെ.സി അബുഹാജി യുടെ സ്മരണക്കായി രൂപം നല്‍കിയ എം.കെ.സി സ്മാരക സമിതി ഏര്‍പ്പെടുത്തിയ മൂന്നാമത് അവാര്‍ഡിന് മുക്കം മുസ്ലിം ഓര്‍ഫനേജ് ജനറല്‍ സെക്രട്ടറി മുക്കം വി മോയിമോന്‍ ഹാജി അര്‍ഹനായി. പതിനായിരത്തി ഒന്ന് രൂപയും ഫലകവും അടങ്ങുന്നതാണ് അവാര്‍ഡ്. പി.വി ഗംഗാധരന്‍,എം.സി മായിന്‍ഹാജി,പി കെ അഹമ്മദ്, നവാസ് പൂനൂര്‍, എന്നിവര്‍ അടങ്ങിയ കമ്മിറ്റിയാണ് അവാര്‍ഡ് ജേതാവിനെ തിരഞ്ഞെടുത്തത്്.

ദീര്‍ഘകാലമായി യതീംഖാന ജനറല്‍ സെക്രട്ടറി സ്ഥാനം അലങ്കരിച്ചുവരികയാണ്. മത രംഗത്തെ പതിറ്റാണ്ടിന്റെ പാരമ്പര്യവും ജീവ കാരുണ്യ പ്രവര്‍ത്തനത്തിലെ ശ്രദ്ധേയമായ സാന്നിധ്യമാണ് മോയിമോന്‍ ഹാജിയെ വേറിട്ടു നിര്‍ത്തുന്നത്. രണ്ട് തവണ മുക്കം യതീംഖാനക്ക് വേണ്ടി ദേശിയ അവാര്‍ഡ് പ്രസിഡന്റില്‍ നിന്ന് ഏറ്റു വാങ്ങിയിട്ടുണ്ട്. സമസ്ത കേരള ഇസ്‌ലാം മതവിദ്യാഭ്യാസ ബോര്‍ഡ് എക്‌സിക്യൂ ട്ടീവ് അംഗവും നിരവധി സ്ഥാപനങ്ങളുടെ മേധാവിയും വിവിധ മഹല്ലു കളുടെ മുതവല്ലിയുമാണ് അദ്ദേഹം മുക്കത്തെ പ്രസിദ്ധമായ വയലില്‍ കുടുംബത്തിലെ മുതിര്‍ന്ന അംഗമാണ.് അവാര്‍ഡ് മാര്‍ച്ച് ആദ്യവാരത്തില്‍ കോഴിക്കോട് നടക്കുന്ന അനുസ്മരണ സമ്മേളനത്തില്‍ വച്ച് സമ്മാനിക്കുമെന്ന് സംഘാടക സമിതി ചെയര്‍മാന്‍ ഡോ. എം കെ മുനീര്‍ എം. എല്‍.എ യും കണ്‍വീനര്‍ കെ മൊയ്തീന്‍കോയയും വാര്‍ത്താ കുറിപ്പില്‍ അറിയിച്ചു.