മഞ്ചേരി: ആതവനാട് പാറമേലേപ്പാട്ട് ഷെരീഫ് (26)നെ കൈക്കോട്ടു കൊണ്ട് തലയ്ക്കടിച്ചു കൊലപ്പെടുത്തിയ കേസില്‍ പ്രതിക്ക് ജീവപര്യന്തം തടവും ഒരുലക്ഷം രൂപ പിഴയും.

ആതവനാട്  മേലേപ്പാട്ട് പൊന്നാണ്ടി കുളമ്പ് കോരന്തൊടി റഷീദ് (25)നെയാണ് രണ്ടാം ജില്ലാ സെഷന്‍സ് കോടതി ജഡ്ജി പി.എസ് ശശികുമാര്‍ ശിക്ഷിച്ചത്. കേസിലെ രണ്ടാം പ്രതിയും ഒന്നാം പ്രതിയുടെ സഹോദരനുമായ ശംസുദ്ദീ(32)നെ കുറ്റക്കാരനല്ലെന്ന് കണ്ട് വിട്ടയച്ചു.

കൊലപാതകത്തിന് ജീവപര്യന്തം തടവും 75,000 രൂപ പിഴയുമാണ് ശിക്ഷ. പിഴയടച്ചില്ലെങ്കില്‍ രണ്ടു വര്‍ഷംകൂടി അധികതടവ് അനുഭവിക്കണം. ആഭരണങ്ങള്‍ കവര്‍ന്ന കുറ്റത്തിന് പത്തു വര്‍ഷം തടവും 25,000 രൂപ പിഴയുമാണ് ശിക്ഷ. പിഴയടച്ചില്ലെങ്കില്‍ ഒരു വര്‍ഷംകൂടി അതിക തടവ് അനുഭവിക്കണം. ശിക്ഷ ഒരുമിച്ച് അനുഭവിച്ചാല്‍ മതി.

2008 ഓഗസ്റ്റ് അഞ്ചിനാണ് കേസിന്നാസ്പദമായ സംഭവം നടന്നത്. കൊല്ലപ്പെട്ട ഷെരീഫിന്റെ ഭാര്യയുടെ ആഭരണങ്ങള്‍ ഒന്നാം പ്രതി റഷീദ് കടം വാങ്ങിയിരുന്നു. ഇത് തിരിച്ചു ചോദിച്ചതിലുള്ള വിരോധമാണ് കൊലപാതകത്തിനു കാരണമായത്. ഷെരീഫിനെ കൈക്കോട്ട് ഉപയോഗിച്ച് തലയ്ക്കടിച്ച് കൊലപ്പെടുത്തിയ ശേഷം ക്വാറിയില്‍ ഉപേക്ഷിക്കുകയായിരിന്നു. മൃതദേഹം 38 ദിവസങ്ങള്‍ക്ക് ശേഷമാണ് കണ്ടെടുത്തത്. കൊല്ലപ്പെട്ട ഷെരീഫിന്റെ സഹോദരന്‍ അബുബക്കര്‍, ഷെരീഫിന്റെ ഭാര്യ റസീന, ജ്വല്ലറി ഉടമ ദത്താസേഠ് എന്നിവരടക്കം കേസില്‍ 73 സാക്ഷികളുണ്ട്. ഇതില്‍ 24പേരെ വിസ്തരിച്ചു. 38രേഖകളും 11 തൊണ്ടി മുതലുകളും കോടതിയില്‍ ഹാജരാക്കി. പ്രോസിക്യൂഷനു വേണ്ടി അഡ്വ: കെ രാജേന്ദ്രന്‍ ഹാജരായി.