ന്യൂഡല്‍ഹി: ടിക്കറ്റ് വില്‍പ്പനയിലെ കരിഞ്ചന്തയും ക്രമക്കേടുകളും തടയാനായി ബുക്കിങിന് ആധാര്‍ നിര്‍ബന്ധമാക്കാനൊരുങ്ങുന്നു. ആധാര്‍ അധിഷ്ടിത ഓണ്‍ലൈന്‍ ടിക്കറ്റ് പദ്ധതി നടപ്പിലാക്കാനാണ് റെയില്‍വ്വേയുടെ തീരുമാനം.

ഇതിന്റെ ഭാഗമായി ഏപ്രില്‍ ഒന്നു മുതല്‍ മുതിര്‍ന്ന പൗരന്മാര്‍ക്ക് ടിക്കറ്റില്‍ ഇളവു ലഭിക്കാന്‍ ആധാര്‍ കാര്‍ഡ് നല്‍കേണ്ടി വരും. മൂന്നു മാസം ഇതിന്റെ പരീക്ഷണം തുടരും.

ക്യാഷ്‌ലെസ്സ് ട്രെയിന്‍ ടിക്കറ്റ് വില്‍പ്പനയാണ് സര്‍ക്കാര്‍ ഉദ്ദേശിക്കുന്നതെന്ന് റെയില്‍വ്വേ മന്ത്രി സുരേഷ് പ്രഭു വ്യക്തമാക്കി. ആധാര്‍ അധിഷ്ടിത ടിക്കറ്റ് വില്‍പ്പനയ്ക്കായി രാജ്യത്താകമാനം 6000 മെഷിനുകള്‍ സ്ഥാപിക്കും.

കൂടാതെ 1000 ഓട്ടാമാറ്റിക് ടിക്കറ്റ് വെന്റിങ് മെഷിനുകള്‍ കൂടി സ്ഥാപിക്കുമെന്നും അദ്ദേഹം വ്യക്തമാക്കി. എല്ലാ സൗകര്യവും ഉള്‍ക്കൊള്ളുന്ന പുതിയ ആപ്പ് പുറത്തിറക്കുമെന്നും മന്ത്രി പറഞ്ഞു.