ചേര്‍ത്തല: സംസ്ഥാനത്ത് എന്‍.ഡി.എയുടെ സ്ഥിതി ദയനീയമാണെന്നും ഭരണം പിടിക്കാന്‍ കഴിയുമെന്ന വിശ്വാസം ജനങ്ങള്‍ക്കില്ലെന്നും ബി.ഡി.ജെ.എസ് നേതൃയോഗത്തിന്റെ വിലയിരുത്തല്‍. ബി.ജെപിക്ക് ഇടമില്ലാതിരുന്ന സംസ്ഥാനത്ത് കഴിഞ്ഞ നിയമസഭാ തെരഞ്ഞെടുപ്പില്‍ ബി.ഡി.ജെ.എസിനൊപ്പം ചേര്‍ന്നപ്പോഴാണ് തല ഉയര്‍ത്താനായത്. ഇതോടെ വെറും ആറു ശതമാനത്തിന്റെ മാത്രം വോട്ടുവിഹിതമുണ്ടായിരുന്ന പാര്‍ട്ടിയുടെ വിഹിതം 16 ശതമാനമായി ഉയര്‍ന്നതായും ചേര്‍ത്തലയില്‍ നടന്ന യോഗത്തില്‍ അവതരിപ്പിച്ച റിപ്പോര്‍ട്ടില്‍ പറയുന്നു.
ബി.ഡി.ജെ.എസിനെ കൂടെക്കൂട്ടി സംസ്ഥാനത്തു നിലയുറപ്പിച്ചെങ്കിലും പാര്‍ട്ടിക്കു നല്‍കിയ വാഗ്ദാനങ്ങള്‍ ബി.ജെ.പി ലംഘിച്ചു. ഇക്കാര്യത്തില്‍ പ്രസിഡന്റ് തുഷാര്‍ വെള്ളാപ്പള്ളി നിരന്തരം ചര്‍ച്ച നടത്തുന്നുണ്ടെങ്കിലും പരിഹാരമുണ്ടാകുന്നില്ല. മുന്‍ ജനറല്‍ സെക്രട്ടറി സുഭാഷ് വാസുവിന്റെ പ്രവര്‍ത്തനങ്ങള്‍ പൊതുജനങ്ങള്‍ക്കിടയില്‍ അവമതിപ്പുണ്ടാക്കിയതായും റിപ്പോര്‍ട്ടില്‍ പറയുന്നു. സംസ്ഥാനത്തെ രാഷ്ട്രീയപാര്‍ട്ടികളില്‍ ആളുള്ള പാര്‍ട്ടികളായ ആറെണ്ണത്തില്‍പെടുന്നതാണ് ബി.ഡി.ജെ.എസെന്ന് സംസ്ഥാന പ്രസിഡന്റ് തുഷാര്‍ വെള്ളാപ്പള്ളി പറഞ്ഞു.