കമ്പില്‍: കമ്പില്‍ ടൗണില്‍ എത്തിച്ചേരുന്ന യാത്രക്കാര്‍ ഒരു ബസ് കാത്തിരിപ്പ് കേന്ദ്രത്തിനു വേണ്ടി കാത്തിരിക്കാന്‍ തുടങ്ങിയിട്ട് രണ്ട് വര്‍ഷമായി. അഴിക്കോട് നിയോജകമണ്ഡലം എം.എല്‍.എ കെ.എം ഷാജി പ്രഖ്യാപിച്ച ഹൈടെക് ബസ് കാത്തിരിപ്പു കേന്ദ്രമെന്ന വാഗ്ദാനമാണ് ചുവപ്പുനാടയില്‍ കുടുങ്ങി കിടക്കുന്നത്. വെയിലും മഴയും കൊള്ളാതെ കയറി നില്‍ക്കാന്‍ സാധിക്കുന്ന ഒരു താല്‍കാലിക ഷെഡെങ്കിലും മതിയെന്നാണ് യാത്രക്കാരുടെ ഇപ്പോഴത്തെ ആവശ്യം. ഇവിടെ ഉണ്ടായിരുന്ന വെയിറ്റിങ് ഷെല്‍ട്ടര്‍ മൂന്നുവര്‍ഷം മുമ്പ് റോഡ് വീതി കൂട്ടുന്നതിന്റെ ഭാഗമായാണ് പൊളിച്ചു നീക്കിയത്. പിന്നീട് കമ്പില്‍ ടൗണിലെ മുസ്‌ലിം ലീഗിന്റെ നേതൃത്വത്തിലുള്ള സന്നദ്ധ സംഘടന താല്‍കാലികമായി ഒരു ഷെഡ് സ്ഥാപിച്ചെങ്കിലും അധികൃതര്‍ പൊളിച്ചു നീക്കുകയായിരുന്നു. ഇതിനിടെയാണ് ഹൈടെക് ബസ് കാത്തിരിപ്പ് കേന്ദ്രം സ്ഥാപിക്കുമെന്ന് കെ.എം. ഷാജി എം.എല്‍.എ പ്രഖ്യാപിച്ചത്. പ്രഖ്യാപനം നടത്തി രണ്ട് വര്‍ഷം പൂര്‍ത്തിയാകാറായിട്ടും  പദ്ധതി ഇതുവരെ യാഥാര്‍ഥ്യമായിട്ടില്ല. മണ്ഡലത്തിലെ വിവിധ ഭാഗങ്ങളില്‍ ഇത്തരത്തില്‍ 10 കാത്തിരിപ്പ് കേന്ദ്രം സ്ഥാപിക്കുമെന്ന് പ്രഖ്യാപിച്ചിരുന്നു. ഇതിനു വേണ്ടി എം.എല്‍.എയുടെ പ്രാദേശിക വികസന ഫണ്ടില്‍ നിന്നു 2015-16 സാമ്പത്തിക വര്‍ഷം 35 ലക്ഷം രൂപ അനുവദിക്കുകയും ചെയ്തിരുന്നു. സര്‍ക്കാരില്‍ നിന്നുള്ള സാങ്കേതികാനുമതിയും ഭരണാനുമതിയും ലഭിച്ച പദ്ധതിയുടെ നിര്‍മാണ ചുമതല അര്‍ധസര്‍ക്കാര്‍ സ്ഥാപനമായ സിഡ്‌കോയ്ക്കാണ് നല്‍കിയത്.  എന്നാല്‍ കക്കാട് ഒഴികെയുള്ള മറ്റൊരിടത്തും നിര്‍മാണം ആരംഭിക്കാനോ പൂര്‍ത്തീകരിക്കാനോ സിഡ്‌കോയ്ക്ക് സാധിച്ചിട്ടില്ല. അകാരണമായി പദ്ധതി വൈകിപ്പിച്ച സിഡ്‌കോയുമായുള്ള കരാര്‍ റദ്ദാക്കി ഉടന്‍ മറ്റൊരു ഏജന്‍സിക്ക് കൈമാറുകയും ഒരു മാസത്തിനകം നിര്‍മാണം ആരംഭിക്കുകയും ചെയ്യുമെന്ന് എം.എല്‍.എ പറഞ്ഞു.