പേരാമ്പ്ര: ചക്കിട്ടപാറ ഗ്രാമ പഞ്ചായത്തില്‍ പെട്ട ചെമ്പനോട ആലംപാറയില്‍ വന്‍ തീപിടിത്തം. കൃഷി വ്യാപകമായി നശിച്ചു. ഇന്നലെ ഉച്ചക്കു രണ്ടോടെയാണ് സംഭവം. ഓടിക്കൂടിയ നാട്ടുകാര്‍ തീയണക്കുകയായിരുന്നു. പേരാമ്പ്രയില്‍ നിന്നു അഗ്‌നിശമന സേനയെത്തിയെങ്കിലും അവരുടെ വാഹനത്തിനു എത്തിപ്പെടാന്‍ പറ്റാത്ത സ്ഥലത്താണ് അഗ്‌നിബാധയുണ്ടായത്. പെരുവണ്ണാമൂഴി പൊലിസും സ്ഥലത്തെത്തിയിരുന്നു. പേരാമ്പ്ര ബ്ലോക്ക് പഞ്ചായത്തംഗം ഷൈല ജയിംസിന്റെ കുടുംബത്തിന്റെ രണ്ട് ഏക്കറോളം റബര്‍ തോട്ടം ഉള്‍പ്പെടെയുളളവ കത്തിനശിച്ചവയില്‍പെടും.
കശുമാവും തെങ്ങും നശിച്ചിട്ടുണ്ട്. ഇല്ലിമൂട്ടില്‍ ബേബി, മലയത്ത് കുഞ്ഞച്ചന്‍ എന്നിവരുടെ കൃഷികളും നശിച്ചിട്ടുണ്ട്. നാട്ടുകാര്‍ ഫയര്‍ ലൈന്‍ തെളിച്ച് തീ പടരാതിരിക്കാന്‍ ശ്രമിച്ചതിനാലാണ് തീ വ്യാപിക്കാതിരുന്നത്. തീപിടിത്തത്തില്‍ ദുരൂഹതയുള്ളതായി നാട്ടുകാര്‍ ആരോപിച്ചു.