തിരുവനന്തപുരം: അനധികൃത സ്വത്തു സമ്പാദനക്കേസില്‍ മുന്‍ മന്ത്രി വി.എസ് ശിവകുമാര്‍ എം.എല്‍.എയുടെ ഭാര്യയുടെ പേരിലുള്ള ബാങ്ക് ലോക്കര്‍ വിജിലന്‍സ് പരിശോധിച്ചു.
ഇന്നലെ വഴുതക്കാട്ടെ ബാങ്കിലെത്തിയ വിജിലന്‍സ് സംഘം ലോക്കര്‍ തുറന്നു പരിശോധിച്ചെങ്കിലും ഒന്നും കണ്ടെത്താനായില്ല. നേരത്തേ ശിവകുമാറിന്റെ വീട്ടില്‍ വിജിലന്‍സ് സംഘം പരിശോധന നടത്തിയപ്പോള്‍ ലോക്കറിനെ സംബന്ധിച്ചുള്ള അന്വേഷണങ്ങള്‍ക്ക് താക്കോല്‍ കാണാനില്ലെന്നായിരുന്നു ശിവകുമാര്‍ മറുപടി നല്‍കിയത്.
ഇതില്‍ സംശയം തോന്നിയാണ് വിജിലന്‍സ് ബാങ്കിന് പ്രത്യേക നിര്‍ദേശം നല്‍കി ലോക്കര്‍ തുറന്നു പരിശോധിച്ചത്. താക്കോല്‍ ഇല്ലാത്തതിനാല്‍ ബാങ്ക് തന്നെ പ്രത്യേക സംവിധാനമൊരുക്കിയാണ് ലോക്കര്‍ തുറന്നത്.
ഉമ്മന്‍ചാണ്ടി സര്‍ക്കാരില്‍ ദേവസ്വം, ആരോഗ്യം മന്ത്രിയായിരിക്കെ ബിനാമി പേരില്‍ വന്‍തോതില്‍ സ്വത്ത് സമ്പാദിച്ചെന്നാണ് കേസ്. കേസില്‍ ശിവകുമാറിനെ ഒന്നാംപ്രതിയാക്കി വിജിലന്‍സ് സ്‌പെഷല്‍ സെല്‍ എഫ്.ഐ.ആര്‍ സമര്‍പ്പിച്ചിരുന്നു.