തെഹ്‌റാന്‍ബയ്ജിങ്: ചൈനയില്‍ താണ്ഡവമാടുന്ന കൊവിഡ് 19 (കൊറോണ) യൂറോപ്പിലും പശ്ചിമേഷ്യയിലും അതിവേഗം പടര്‍ന്നുപിടിക്കുന്നു. ചൈനയിലേതിനേക്കാളും വേഗതിയിലാണ് യുറോപ്പിലും പശ്ചിമേഷ്യയിലും കൊവിഡ് 19ന്റെ വ്യാപനമെന്നാണ് റിപ്പോര്‍ട്ടുകള്‍. ഇറ്റലി, ഇറാന്‍, ദക്ഷിണ കൊറിയ, തായ്‌വാന്‍ എന്നീ രാജ്യങ്ങളിലാണ് നിലവില്‍ വൈറസ് അതിവേഗം പടര്‍ന്നുപിടിക്കുന്നത്. 

അതിനിടെ, എസ്‌റ്റോണിയ, ഡെന്‍മാര്‍ക്ക്, ജോര്‍ജിയ, സ്വീഡന്‍, നോര്‍വേ, റോമാനിയ, ഗ്രീസ്, അള്‍ജീരിയ എന്നിവിടങ്ങളിലും പുതുതായി കൊവിഡ് 19 സ്ഥിരീകരിച്ചിരുന്നു. ഇറാനില്‍ കൊവിഡ് 19 ബാധിച്ച് മരിച്ചവരുടെ എണ്ണം 26 ആയി. 106 പേര്‍ക്കുകൂടി രോഗം സ്ഥിരീകരിച്ചു. ഇതോടെ രോഗബാധിതരുടെ എണ്ണം 245 ആയി. നിലവില്‍ ഇറാനിലാണ് രോഗത്തിന്റെ വ്യാപനം കൂടുതല്‍. പശ്ചിമേഷ്യന്‍ രാജ്യങ്ങളില്‍ 220 പേര്‍ക്ക് കൊവിഡ് 19 സ്ഥിരീകരിച്ചതായാണ് വിവിരം. ഇറാഖില്‍ ആറാമത്തെ ആള്‍ക്കും സ്ഥിരീകരിച്ചു. തായ്‌വാനില്‍ 32 പേര്‍ക്ക് രോഗം സ്ഥിരീകരിച്ചതായാണ് വിവരം. ഇതോടെ രാജ്യത്ത് അതീവ ജാഗ്രത പ്രഖ്യാപിച്ചിരിക്കുകയാണ്. 

 

ജപ്പാനില്‍ ടൂറിസ്റ്റ് ബസില്‍ ഗൈഡായി പ്രവര്‍ത്തിക്കുന്ന വനിതയ്ക്ക് രണ്ടാം തവണയും കൊറോണ വൈറസ് ബാധിച്ചു. ദക്ഷിണ കൊറിയയില്‍ മരിച്ചവരുടെ എണ്ണം 13 ആയി. 1,766 പേര്‍ക്ക് വൈറസ് സ്ഥിരീകരിച്ചതായി ദക്ഷിണ കൊറിയന്‍ ആരോഗ്യ വകുപ്പ് അറിയിച്ചു. ഇറാനില്‍ നാഷനല്‍ സെക്യൂരിറ്റി ആന്‍ഡ് ഫോറിന്‍ റിലേഷന്‍ കമ്മിഷന്‍ മേധാവിക്കും കൊവിഡ് 19 സ്ഥിരീകരിച്ചു. ഫ്രാന്‍സില്‍ 18 പേര്‍ക്ക് രോഗം സ്ഥിരീകരിച്ചു. എസ്‌റ്റോണിയയില്‍ ഇറാനില്‍നിന്നെത്തിയ ആള്‍ക്കാണ് വൈറസ് സ്ഥിരീകരിച്ചത്. ഇറ്റലിയില്‍നിന്നെത്തിയ ആള്‍ക്കാണ് ഡെന്‍മാര്‍ക്കില്‍ രോഗം സ്ഥിരീകരിച്ചത്.

അതേസമയം, ചൈനയില്‍ വൈറസ് ബാധയും മരണനിരക്കും കുറഞ്ഞു. 433 പേര്‍ക്കാണ് പുതുതായി കൊവിഡ് 19 സ്ഥിരീകരിച്ചത്. 29 മരണങ്ങളാണ് ബുധനാഴ്ച ഉണ്ടായത്. ജനുവരി 28ന് ശേഷമുള്ള ഏറ്റവും കുറഞ്ഞ മരണ നിരക്കാണിത്. ചൈനയില്‍ മൊത്തം മരിച്ചവരുടെ എണ്ണം 2,744 ആയി. വൈറസ് ബാധിച്ചവരുടെ എണ്ണം 78,497 ആയി. കഴിഞ്ഞ ദിവസം റിപ്പോര്‍ട്ട് ചെയ്ത 29 മരണങ്ങളില്‍ 26 എണ്ണവും ഹുബൈ പ്രവിശ്യയില്‍നിന്നാണ്. ബെയ്ജിങ്, ഹെയോങ്ജിയാങ്, ഹെനന്‍ മേഖലയില്‍ ഓരോ മരണങ്ങളും റിപ്പോര്‍ട്ട് ചെയ്തു. ആകെ 32,495 പേരെ ആശുപത്രിയില്‍നിന്ന് ഡിസ്ചാര്‍ജ് ചെയ്തിട്ടുണ്ട്.