ചാലക്കുടി: ദേശീയപാതയോരത്ത് സെപ്റ്റിക് മാലിന്യം തള്ളിയ സംഭവവുമായി ബന്ധപ്പെട്ട് ഒരാളെ കൊരട്ടി പൊലിസ് സബ്ബ് ഇന്‍സ്‌പെക്ടര്‍ ജയേഷ് ബാലന്‍ അറസ്റ്റ് ചെയ്തു. വെസ്റ്റ് ബംഗാള്‍ സ്വദേശി മനിറുള്‍ ഇസ്‌ലാം(25)ആണ് പിടിയിലായത്.
മാലിന്യം കൊണ്ടുവന്ന ലോറിയും പൊലിസ് കസ്റ്റഡിയിലെടുത്തു. ഇക്കഴിഞ്ഞ ഞായറാഴ്ച ദേശീയപാതയില്‍ പെരുമ്പിക്കും ജെ.ടി.എസ് ജങ്ഷനും ഇടക്കാണ് പുലര്‍ച്ചെ മാലിന്യം ഒഴുക്കിയത്. പ്രദേശത്ത് സ്ഥിരമായി മാലിന്യം നിക്ഷേപിക്കുന്നത് പതിവായതിനെ തുടര്‍ന്ന് നാട്ടുകാരുടെ നിരീക്ഷണത്തിലായിരുന്നു. ഞായറാഴ്ച പുലര്‍ച്ചെ അസ്വഭാവികമായി വാഹനം നിര്‍ത്തുന്നത് കണ്ട നാട്ടുകാര്‍ എത്തിയപ്പോഴേക്കും വാഹനവുമായി പ്രതി കടന്ന് കളഞ്ഞു. തുടര്‍ന്ന് കൊരട്ടി ജങ്ഷനിലെ ഓട്ടോ ഡ്രൈവമാര്‍ വാഹനം തടയാന്‍ ശ്രമം നടത്തിയെങ്കിലും പ്രതി വാഹനവുമായി രക്ഷപ്പെടുകയായിരുന്നു.
നാട്ടുകാരുടെ പരാതിയെ തുടര്‍ന്ന് കൊരട്ടി പൊലിസ് നടത്തിയ അന്വേഷണത്തിലാണ് പ്രതി പിടിയിലായത്.
അന്വേഷണ സംഘത്തില്‍ എ.എസ്.ഐ ചന്ദ്രന്‍, സി.പി.ഒമാരായ സിജു ആലുക്ക, പ്രദീഷ് എന്നിവരും ഉണ്ടായിരുന്നു.