തിരൂര്‍: നാലുകെട്ടിലെ കഥാപാത്രമായ അപ്പുണ്ണി താനല്ലെന്ന് എം.ടി വാസുദേവന്‍ നായര്‍. സംസ്ഥാന സ്റ്റുഡന്റ് പൊലിസ് കേഡറ്റ് 'നോളജ് ഫെസ്റ്റ് 2020'ല്‍ വിദ്യാര്‍ഥികളുമായി സംവദിക്കുകയായിരുന്നു എം.ടി. ജീവിതത്തില്‍ എവിടെയെങ്കിലും കാണുകയോ കേള്‍ക്കുകയോ ചെയ്തവരാണ് തന്റെ കഥാപാത്രങ്ങളായി രൂപാന്തരം പ്രാപിച്ചത്. 

ഒരു പരാധീനതയും ഇല്ലാത്തവരായി ആരുമില്ല. അറിവിലൂടെ പരാധീനതകളെ മറികടക്കാന്‍ നമുക്കാവണം. സാധാരണ കര്‍ഷക കുടുംബത്തില്‍നിന്ന് സാഹിത്യ ലോകത്തേക്കുള്ള തന്റെ വളര്‍ച്ച എം.ടി കുട്ടികള്‍ക്കു മുന്നില്‍ അവതരിപ്പിച്ചു.  പ്രകൃതിയെ അറിഞ്ഞും സ്‌നേഹിച്ചും ജീവിച്ചാല്‍ പ്രളയമുള്‍പ്പടെയുള്ള തിരിച്ചടികള്‍ നമുക്ക് നേരിടേണ്ടി വരുമായിരുന്നില്ല.  മാതൃഭാഷയുടെ സംരക്ഷണവും ജാതിമതവര്‍ഗങ്ങള്‍ക്കപ്പുറത്തേക്ക് മതിലുകളില്ലാത്ത ലോകം പടുത്തുയര്‍ത്തുകയുമാണ് ശക്തമായ തലമുറയിലേക്കുള്ള മൂന്ന് പ്രധാന പാഠങ്ങളെന്നും ഓര്‍മപ്പെടുത്തിയാണ് എം.ടി മടങ്ങിയത്.