കാസര്‍കോട്: പെരുമ്പാവൂരിലെ ജിഷ കൊലപാതകത്തിലെ പ്രതി ഇതരസംസ്ഥാന തൊഴിലാളിയാണെന്നു തെളിഞ്ഞതിന്റെ പശ്ചാത്തലത്തില്‍ ജില്ലയില്‍ ഇതരസംസ്ഥാന തൊഴിലാളികളെ കുറിച്ചുള്ള വിവര ശേഖരണം വേഗത്തിലാക്കാന്‍ ജില്ലാ പൊലിസ് മേധാവി പൊലിസ് സ്റ്റേഷനുകളില്‍ നിര്‍ദേശം നല്‍കി. ജിഷയെ ക്രൂരമായി ബലാത്സംഗം ചെയ്തു കൊലപ്പെടുത്തിയ കേസില്‍ അസം സ്വദേശി അറസ്റ്റിലായ സംഭവത്തിന്റെ പശ്ചാത്തലത്തില്‍ കേരളത്തിലെ ഇതരസംസ്ഥാനതൊഴിലാളികളുടെ മുഴുവന്‍ വിവരങ്ങളും ശേഖരിക്കാന്‍ സര്‍ക്കാര്‍ അതാതു ജില്ലാഭരണകൂടങ്ങള്‍ക്കു നിര്‍ദേശം നല്‍കിയിട്ടുണ്ട്. ഇതിന്റെ പശ്ചാത്തലത്തിലാണു കാസര്‍കോട് ജില്ലയില്‍ അന്യസംസ്ഥാന തൊഴിലാളികളുടെ കണക്കെടുപ്പ് വേഗത്തില്‍ പൂര്‍ത്തിയാക്കാന്‍ എസ്.പി നിര്‍ദേശം നല്‍കിയിരിക്കുന്നത്.
സംസ്ഥാനത്തു മറുനാട്ടുകാര്‍ക്ക് താമസിക്കാന്‍ കെട്ടിടങ്ങള്‍ വാടകക്കു നല്‍കുമ്പോള്‍ ഇവരുടെ വിലാസവും തിരിച്ചറിയല്‍ രേഖകളും വാങ്ങാത്ത ഉടമകള്‍ക്കെതിരേ കര്‍ശന നടപടി സ്വീകരിക്കാനാണ് എസ്.പി നിര്‍ദേശം നല്‍കിയിരിക്കുന്നത്. അതാതു സ്റ്റേഷനുകളിലെ എസ്. ഐമാര്‍ക്കാണ് ഇതിന്റെ ഉത്തരവാദിത്വം. രഹസ്യാന്വേഷണവിഭാഗത്തിന്റെ സഹായവും ഇതിനായി തേടും.
കാസര്‍കോട് ജില്ലയിലെ വിവിധ ഭാഗങ്ങളില്‍ ക്വാര്‍ട്ടേഴ്‌സുകളിലും വാടകവീടുകളിലും മറ്റുമായി നിരവധി ഇതരസംസ്ഥാനക്കാര്‍ താമസിക്കുന്നുണ്ട്. ബംഗാള്‍, ഒറീസ, അസാം, ബിഹാര്‍ തുടങ്ങിയ ഉത്തരേന്ത്യന്‍ സംസ്ഥാനങ്ങളില്‍ നിന്നുള്ളവരാണ് ഇവരില്‍ കൂടുതലും. കൃത്യമായ വിലാസങ്ങളും തിരിച്ചറിയല്‍ രേഖകളും നല്‍കാതെയാണ് ഭൂരിഭാഗം പേരും കഴിയുന്നത്. ഇവര്‍ക്കു താമസിക്കാന്‍ സൗകര്യങ്ങള്‍ നല്‍കുമ്പോള്‍ ഇവരുടെ വിലാസവും മറ്റുമടക്കം വിശദമായ വിവരങ്ങള്‍ ശേഖരിക്കണമെന്ന് മുമ്പ് തന്നെ പൊലിസ് ക്വാര്‍ട്ടേഴ്‌സ് ഉടമകള്‍ക്കും മറ്റും നിര്‍ദേശം നല്‍കിയിരുന്നുവെങ്കിലും ഇതൊന്നും പാലിക്കപ്പെടുന്നില്ല.
നീലേശ്വരത്തും കാഞ്ഞങ്ങാട്ടും നടന്ന നാടിനെ നടുക്കിയ രണ്ടു കൊലപാതകക്കേസുകളില്‍ ഇതരസംസ്ഥാനക്കാര്‍ പ്രതികളാണ്. മടിക്കൈ സ്വദേശിനിയായ ഭര്‍തൃമതിയെ കുത്തിക്കൊന്ന കേസും കാഞ്ഞങ്ങാട്ട് കാര്‍ വാര്‍ വാഷിങ് സ്ഥാപനത്തില്‍ യുവാവിനെ കൊലപ്പെടുത്തിയ കേസിലും പ്രതികളായ ഇതരസംസ്ഥാനക്കാര്‍ ഇപ്പോഴും ജയിലിലാണ്. ഈ സംഭവങ്ങളുടെ അടിസ്ഥാനത്തില്‍ ജില്ലയിലെ ഇതരസംസ്ഥാനക്കാര്‍ക്കിടയിലെ കുറ്റവാളികളെ കണ്ടെത്താന്‍ അന്വേഷണമുണ്ടായെങ്കിലും പിന്നീട് നടപടികളെല്ലാം നിലയ്ക്കുകയായിരുന്നു.
കാസര്‍കോടിനടുത്ത് നുള്ളിപ്പാടിയിലാണ് ഏറ്റവും കൂടുതല്‍ ഇതരസംസ്ഥാന തൊഴിലാളികള്‍ താമസിക്കുന്നത്. ഇവരെക്കുറിച്ചുള്ള വിവരങ്ങള്‍ രഹസ്യാന്വേഷണവിഭാഗം വെള്ളിയാഴ്ച രാവിലെ ശേഖരിച്ചു.