കഠിനംകുളം: ലോക സ്ത്രീദിനത്തില്‍ യുവതിയെ വീട്ടില്‍ കയറി ആക്രമിക്കാന്‍ ശ്രമിച്ച ഇതരസംസ്ഥാന തൊഴിലാളിയെ പൊലിസ് പിടികൂടി. വെസ്റ്റ് ബംഗാള്‍ സ്വദേശിയായ ധനശ്യാം പുഷ്ടി (47) നെയാണ് തുമ്പ പൊലിസ് അറസ്റ്റ് ചെയ്തത്. കുളത്തൂര്‍ ഇന്‍ഫോസിസിന് സമീപം ബുധനാഴ്ച രാവിലെയായിരുന്നു സംഭവം. കഴിഞ്ഞ ആറ് വര്‍ഷമായി ഇന്‍ഫോസിസിന് സമീപം കിഴക്കുംകര പ്രദേശത്താണ് ധനശ്യാമും കൂട്ടരും വാടകയ്ക്ക് വീടെടുത്ത് താമസിക്കുന്നത്.
രാവിലെ യുവതി മാത്രമാണ് വീട്ടിലുള്ളതെന്ന് മനസിലാക്കിയ ധനശ്യാം അരി ചോദിച്ച് യുവതിയുടെ വീട്ടിലെത്തുകയായിരുന്നു. ഗേറ്റ് അടച്ച് വീട്ടിനുള്ളിലേയ്ക്ക് കയറുകയായിരുന്ന യുവതിയുടെ പിന്നാലെ എത്തി വാതില്‍ തള്ളിത്തുറന്ന് യുവതിയെ കടന്ന് പിടിക്കാന്‍ ശ്രമിക്കുകയായിരുന്നു. എന്നാല്‍ പൊടുന്നനെ യുവതിയും സഹോദരിയും പിന്‍വാതിലിലൂടെ ഓടി രക്ഷപ്പെടുകയായിരുന്നു. ഇവരുടെ നിലവിളികേട്ട് നാട്ടുകാര്‍ ഓടി എത്തിയപ്പോഴേയ്ക്കും പ്രതി ഓടി രക്ഷപ്പെടുകയായിരുന്നു. സംഭവമറിഞ്ഞ് ഉടന്‍ സ്ഥലത്തെത്തിയ സൈബര്‍ സിറ്റി അസിസ്റ്റന്റ് കമ്മിഷണര്‍ പ്രമോദ് കുമാര്‍, സി.ഐ. അജിത് കുമാര്‍, തുമ്പ എസ്.ഐ. സനോജ് എന്നിവരുടെ നേതൃത്വത്തിലാണ് പ്രതിയെ അറസ്റ്റ് ചെയ്യ്തത്.