ഇരിട്ടി: ആറളംഫാമില്‍ കാട്ടാനയെ ചരിഞ്ഞനിലയില്‍ കണ്ടെത്തി. ഫാമിലെ അഞ്ചാം ബ്ലോക്കിലാണ് കൊമ്പനാനയെ ചരിഞ്ഞനിലയില്‍ കണ്ടെത്തിയത്. ജഡത്തിന് ഒരാഴ്ചത്തെ പഴക്കമുണ്ട്. ആറളംഫാമില്‍ തമ്പടിച്ചിരുന്ന കാട്ടാന കൂട്ടങ്ങളില്‍ ഉള്‍പ്പെട്ട 15 വയസ് പ്രായമുള്ള കൊമ്പനാനയെ ആണ് ഇന്നലെ ചരിഞ്ഞനിലയില്‍ കണ്ടെത്തിയത്.
രാവിലെ ആറളംഫാമിലെ അഞ്ചാം ബ്ലോക്കില്‍ എത്തിയ തൊഴിലാളികള്‍ ദുര്‍ഗന്ധം കാരണം കശുമാവിന്‍ തോപ്പിലെത്തി പരിശോധിച്ചപ്പോഴാണു കാട്ടാനയുടെ ജഡം കണ്ടത്. ഉടന്‍ വനംവകുപ്പ് അധികൃതരെ വിവരമറിയിക്കുകയായിരുന്നു. ഏകദേശം ഒരാഴ്ച മുന്‍പാണു കാട്ടാന ചെരിഞ്ഞതെന്നാണ് വനംവകുപ്പിന്റെ നിഗമനം.
ജഡത്തില്‍ നിന്നു ഒരു കൊമ്പ് ഉള്‍പ്പെടെ വേര്‍പെട്ട നിലയിലാണ്. വനപാലക സംഘം സ്ഥലത്തെത്തി പരിശോധന നടത്തി. ഫാമിനകത്ത് അടുത്തിടെ ചരിഞ്ഞ അഞ്ചാമത്തെ കാട്ടാനയാണ് ഈ കൊമ്പന്‍. മുന്‍പ് ഏഴാം ബ്ലോക്കിലും നാലാം ബ്ലോക്കിലും ആനമുക്കിലും ഫാം സ്‌കൂളിനു സമീപത്തുമായി കാട്ടാനകള്‍ ചരിഞ്ഞിരുന്നു.