മുട്ടം: കാറിനു പിറകില്‍ ഇടിച്ച ശേഷം നിര്‍ത്താതെ പോയ ആഡംബര ജീപ്പ് നാട്ടുകാര്‍ തടഞ്ഞു. ഞായറാഴ്ച രാത്രി ഏഴ് മണിയോടെയാണ് സംഭവം. ഒളമറ്റത്തുവച്ചാണ് മുട്ടം സ്വദേശികളായ കുടുംബം സഞ്ചരിച്ചിരുന്ന കാറിനു പിറകില്‍ ജീപ്പ് ഇടിച്ചത്. കൊല്ലപ്പള്ളി സ്വദേശിയായ ഡോക്ടറുടെ ഉടമസ്ഥതയിലുള്ളതാണ് ജീപ്പ്. ഇടിച്ചതിന് ശേഷം നിര്‍ത്താതെ പോയ ജീപ്പ് മുട്ടം ബാറിനുള്ളില്‍ പ്രവേശിപ്പിച്ചു. സംഭവമറിഞ്ഞ നാട്ടുകാര്‍ ബാറില്‍ നിന്ന് പുറത്തു വന്ന ജീപ്പ് ടൗണില്‍ തടഞ്ഞു. കാറില്‍ ഇടിച്ച സമയത്തും ജീപ്പിലുണ്ടായിരുന്നവര്‍ മദ്യപിച്ചിരുന്നതായി കാര്‍ യാത്രികര്‍ പറഞ്ഞു. ഇടിയുടെ ആഘാതത്തില്‍ കാറിന്റെ പിന്‍ഭാഗം പൂര്‍ണമായും തകര്‍ന്നു. കാറിനുണ്ടായ തകരാര്‍ പരിഹരിക്കാമെന്ന ഉറപ്പിന്മേല്‍ പ്രശ്‌നം ഒത്തുതീര്‍പ്പാക്കി.