തൊടുപുഴ: കലയന്താനി, കൊന്താലപള്ളി മേഖലകളില്‍ പേപ്പട്ടി ആക്രമണം. നായയുടെ കടിയേറ്റ ഒരാളെ കോട്ടയം മെഡിക്കല്‍ കോളജ് ആശുപത്രിയിലും രണ്ട് പേരെ തൊടുപുഴ ജില്ലാ ആശുപത്രിയിലും പ്രവേശിപ്പിച്ചു. ഒന്നരമണിക്കൂറോളം പ്രദേശത്ത് പരിഭ്രാന്തി പരത്തിയ നായ നിരവധി വളര്‍ത്തു മൃഗങ്ങളെയും ആക്രമിച്ച് പരുക്കേല്‍പ്പിച്ചു.
ഇന്നലെ രാവിലെയാണ് സംഭവം. റിട്ട. അധ്യാപകന്‍ കല്ലുപുരയിടം ജോസഫിനെയും റേഷന്‍ കടയിലെ ജീവനക്കാരിയെയുമാണ് ആദ്യം ആക്രമിച്ചത്. സാരമായി പരുക്കേറ്റ ജോസഫിനെയാണ് കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചത്.
കുന്നുംപുറത്ത് ഇബ്രാഹിം, പ്ലാമൂട്ടില്‍ ഈശ എന്നിവരുടെ പശുക്കളെയും, കലയന്താനി സ്വദേശി ചന്ദ്രിക, കണ്ണിക്കാട്ടുകുഴി സണ്ണി എന്നിവരുടെ ആടിനെയും, വെള്ളാരംകുന്നേല്‍ ഷേര്‍ലിയുടെ രണ്ട് വളര്‍ത്തുനായകളെയും നായ കടിച്ചു.
നിരവധി വളര്‍ത്തുനായ്ക്കള്‍ക്കും കടിയേറ്റിട്ടുണ്ട്. നാട്ടുകാര്‍ ഉച്ചയോടെ പേപ്പട്ടിയെ തല്ലിക്കൊന്നു. കടിയേറ്റ മൃഗങ്ങള്‍ക്ക് ആലക്കോട് മൃഗാശുപത്രിയില്‍ നിന്നു ഡോക്ടറെത്തി പ്രതിരോധ കുത്തി വയ്പ് നടത്തി.എന്നാല്‍ സംഭവം അറിയിച്ചിട്ടും പഞ്ചായത്ത് അധികൃതര്‍ തിരിഞ്ഞുനോക്കിയില്ലെന്ന് നാട്ടുകാര്‍ പരാതിപ്പെട്ടു.