കുറ്റ്യാടി: ഭൂമിയും വീടുമില്ലാത്തവര്‍ക്കും, കാര്‍ഷിക പദ്ധതികള്‍ക്കും ഊന്നല്‍ നല്‍കി 2018-19 വര്‍ഷത്തെ കാവിലുംപാറ പഞ്ചായത്ത് ബജറ്റ് വൈസ് പ്രസിഡന്റ് പി.പി ചന്ദ്രന്‍ അവതരിപ്പിച്ചു. പ്രസിഡന്റ് അന്നമ്മ ജോര്‍ജ് അധ്യക്ഷയായി.
21,38,94573 രൂപ വരവും 21,07,61058 രൂപ ചെലവും പ്രതീക്ഷിക്കുന്നതാണ് ബജറ്റ്. വീടില്ലാത്തവര്‍ക്കുള്ള ഭവന പദ്ധതിക്ക് ഏഴു കോടി, കാര്‍ഷിക മേഖലയ്ക്ക് മൂന്നു കോടി, ഗ്രാമീണ റോഡുകളുടെ സമഗ്ര വികസനത്തിനായി രണ്ടര കോടി എന്നിങ്ങനെയാണ് വകയിരുത്തല്‍. പക്രന്തളം ചുരം സൗന്ദര്യവല്‍ക്കരണം നടത്തുന്നതിന് വിവിധ നൂതന പദ്ധതികള്‍ ബജറ്റിന്റെ ഭാഗമായിട്ടുണ്ട്. രോഗപ്രതിരോധ പ്രവര്‍ത്തനങ്ങള്‍ ഊര്‍ജിതമാക്കുന്നതിന് ഒരു കോടിയും സമഗ്രവിദ്യാഭ്യാസ പദ്ധതിയുടെ ഭാഗമായി കുടലില്‍ ഗവ. എല്‍.പി സ്‌കൂള്‍ ആധുനിക രീതിയില്‍ സ്മാര്‍ട്ട് ആക്കുന്നതിനും ഫണ്ട് വകയിരുത്തി. ബജറ്റ് ചര്‍ച്ചയില്‍ ജോസഫ് കാഞ്ഞിരത്തിങ്കല്‍, സൂപ്പി മണക്കര, ബോബി മൂക്കന്‍തോട്ടം, പുഷ്പ തോട്ടുംചിറ, മായ പുല്ലാട്ട്, കെ.ടി സുരേഷ്, കെ.കെ മോളി പങ്കെടുത്തു.