മങ്കട: മങ്കട പൊലിസ് സ്റ്റേഷന്‍ പരിധിയില്‍ നടന്ന വിവിധ മോഷണ കുറ്റങ്ങളില്‍ പൊലിസ് വേണ്ടത്ര ജാഗ്രത പാലിക്കുന്നില്ലെന്നു നാട്ടുകാരുടെ ആക്ഷേപം. വെള്ളിലയിലും പരിസരങ്ങളിലും വീടുകളില്‍ കഴിഞ്ഞ ദിവസങ്ങളിലുണ്ടായ മോഷണ സംഭവങ്ങളുള്‍പ്പെടെ മങ്കട പാലിസ് സ്റ്റേഷന്‍ പരിധിയില്‍ നിരവധി മോഷണങ്ങളാണ് ഒരു വര്‍ഷത്തിനുള്ളില്‍ നടന്നത്.
കഴിഞ്ഞ ഏതാനും മാസങ്ങള്‍ക്കുള്ളില്‍തന്നെ ഡസന്‍ കണക്കിനു സ്വര്‍ണാഭരണങ്ങളാണ് വിവിധ ഭവനങ്ങളില്‍നിന്നു നഷ്ടപ്പെട്ടത്. വീടുകള്‍ കുത്തിത്തുറന്നും മറ്റും രാത്രിയില്‍ നടത്തുന്ന ഇത്തരം മോഷണ സംഭവങ്ങളില്‍ തുടക്കത്തിലേ അന്വേഷണം അവസാനിപ്പിക്കുന്നതാണ് കണ്ടുവരുന്നത്. മോഷ്ടാക്കള്‍ ആരെന്നു കണ്ടെത്താനുള്ള നീക്കങ്ങളും നടപടികളും പൊലിസ് ഭാഗത്തുനിന്ന് ഉണ്ടാകുന്നില്ലെന്നാണ് വിവിധ പ്രദേശവാസികള്‍ പറയുന്നത്.
മോഷണം ആവര്‍ത്തിക്കപ്പെടുന്നതു പൊലിസിന്റെ നിഷക്രിയത്വം മൂലമാമെന്നാണ് വിവിധ ഭാഗങ്ങളില്‍നിന്നു പണവും സ്വര്‍ണാഭരണങ്ങളും നഷ്ടപ്പെട്ട വീട്ടുകാരുടെ പരാതി. രാമപുരം, തിരൂര്‍ക്കാട്, വള്ളിക്കാപറ്റ, അരിപ്ര, കാച്ചിനിക്കാട്, മക്കരപ്പറമ്പ് തുടങ്ങിയ പ്രദേശങ്ങളിലെ വിവിധ ഭവനങ്ങളാണ് കവര്‍ച്ചയ്ക്കിരയായത്. മോഷണ സംഭവങ്ങള്‍ ആവര്‍ത്തിക്കാതിരിക്കാന്‍ വേണ്ട മുന്‍ കരുതലുകള്‍ ഒന്നും പൊലിസ് അധികാരികളില്‍നിന്നുണ്ടാകുന്നില്ലെന്ന് ആരോപിക്കുന്ന നാട്ടുകാര്‍, മോഷണ സംഭവങ്ങളില്‍ യഥാര്‍ഥ കുറ്റവാളികളെ നിയമത്തിനുമുന്നില്‍ കൊണ്ടുവരണമെന്നും ആവശ്യപ്പെടുന്നു.