അരീക്കോട്: ലക്ഷങ്ങള്‍ ചെലവഴിച്ച് നിര്‍മാണം പൂര്‍ത്തീകരിച്ച ഗവ. ഐ.ടി.ഐ ഹോസ്റ്റല്‍ കാഴ്ചവസ്തുവാകുന്നു. അരീക്കോട് ഗവ. ഐ.ടി.ഐയിലെ വിദ്യാര്‍ഥികള്‍ക്കു താമസ സൗകര്യത്തിനായി നിര്‍മിച്ച ഇരുനില കെട്ടിടമാണ് കാന്റീന്‍ ഇല്ലാത്തതിനാല്‍ സജീവമല്ലാത്തത്.
1984ല്‍ അന്നത്തെ തൊഴില്‍ വകുപ്പ് മന്ത്രിയുടെ അധ്യക്ഷതയില്‍ മുഖ്യമന്ത്രി ഉദ്ഘാടനം ചെയ്ത എട്ടു മുറികളുള്ള കെട്ടിടത്തില്‍ ഇപ്പോള്‍ ആറു വിദ്യാര്‍ഥികള്‍ മാത്രമാണ് താമസിക്കുന്നത്. ഹോസ്റ്റലില്‍ താമസിക്കുന്ന വിദ്യാര്‍ഥികള്‍ക്കു കാന്റീന്‍ സൗകര്യം ഏര്‍പ്പെടുത്താന്‍ അധികൃതര്‍ തയാറാകാത്തതാണ് ഹോസ്റ്റലിനോടടുക്കാന്‍ വിദ്യാര്‍ഥികള്‍ മടിക്കുന്നതിനു കാരണം. ഹോസ്റ്റലില്‍ താമസിക്കുന്ന വിദ്യാര്‍ഥികള്‍ രാത്രി കാലങ്ങളില്‍വരെ പുറത്തുപോയി ഭക്ഷണം കഴിക്കേണ്ടണ്ട അവസ്ഥയിലാണ്.
കാന്റീന്‍ അനുവദിക്കണമെന്നാവശ്യപ്പെട്ട് കലക്ടര്‍ ചെയര്‍മാനായ നിര്‍മിതിയിലേക്ക് അപേക്ഷ നല്‍കിയിരുന്നെങ്കിലും കാന്റീനു പകരം ലഭിച്ചത് ഐ.ടി ലാബായിരുന്നു.