കാലടി: സംസ്‌കൃത സര്‍വകലാശാലയിലെ അയ്യനാര്‍ ശില്‍പ്പങ്ങള്‍ നശിക്കുന്നതില്‍ പ്രതിഷേധം ശക്തമാകുന്നു. സംസ്‌കൃതസര്‍വകലാശാലയും കേരള ലളിതകല അക്കാദമിയും സംയുക്തമായി ലക്ഷങ്ങള്‍ മുടക്കിയാണ് അയ്യനാര്‍ ശില്‍പ്പങ്ങള്‍ നിര്‍മ്മിച്ചത്.
പൂര്‍ണമായും കളിമണ്ണില്‍ രൂപപ്പെടുത്തിയ ശില്‍പങ്ങള്‍  നിര്‍മ്മാണം കഴിഞ്ഞ് മാസങ്ങളായിട്ടും  വെയിലും മഴയുമേറ്റ് നശിച്ചുകൊണ്ടിരിക്കുകയാണ്. ശില്‍പങ്ങളുടെ പലഭാഗങ്ങളും അടര്‍ന്നും പോയി. ഇത് സംരക്ഷിക്കാന്‍ അധികൃതര്‍ തയാറാകുന്നില്ലെന്നാണ് പരാതി.
ശില്‍പങ്ങള്‍ സംരക്ഷിക്കുവാനുള്ള നടപടി അടിയന്തിരമായി സ്വീകരിക്കണമെന്നാവശ്യപ്പെട്ട് കെ.എസ്.യു പ്രതിഷേധ സമരം നടത്തിയിരുന്നു.
തമിഴ്‌നാട്ടിലെ പുതുക്കോട്ടയില്‍ അയ്യനാര്‍ ആരാധനയുടെ ഭാഗമായാണ് ശില്‍പങ്ങള്‍ നിര്‍മ്മിച്ചിരിക്കുന്നത്. സര്‍വകലാശാലയിലെ വിദ്യാര്‍ഥികള്‍ക്ക് അയ്യനാര്‍ ശില്‍പ്പങ്ങളെക്കുറിച്ച് പഠിക്കുന്നതിനായാണ് ശില്‍പങ്ങള്‍ നിര്‍മ്മിച്ചിരിക്കുന്നത്.