കിഴിശ്ശേരി: തനിയംപുറത്ത് ഓവുപാലം അപകടഭീഷണിയില്‍. മുതവല്ലുര്‍ പഞ്ചായത്തിലെ തനിയംപുറം അങ്ങാടിയില്‍ പള്ളിയുടെ പരിസരത്ത് തോടിന് കുറുകെയുള്ള ഓവുപാലമാണ് അപകട ഭീഷണിയുയര്‍ത്തുന്നത്. ഓവുപാലത്തിനടിയില്‍ കോണ്‍ക്രീറ്റ് ഇളകി കമ്പികള്‍ തുരുമ്പിച്ചുനില്‍ക്കുകയാണ്. ഏതു നിമിഷവും തകര്‍ന്നുവീഴുന്ന സ്ഥിതിയിലാണ് പാലം. ഇതുവഴി സ്‌കൂള്‍ ബസുകളടക്കം ദിവസവും നൂറുകണക്കിനു വാഹനങ്ങളാണ് കടന്നുപോകുന്നത്. വര്‍ഷങ്ങള്‍ പഴക്കമുള്ള ഓവുപാലം പുതുക്കിപ്പണിയണമെന്ന ആവശ്യം ശക്തമാവുകയാണ്.