ദുബൈ:ദുബൈയിലെ താൽക്കാലിക ശൈത്യകാല ക്യാംപിങ് സീസൺ ഈ മാസം 21 ന് ആരംഭിച്ച് 2025 ഏപ്രിൽ അവസാനം വരെ തുടരുമെന്ന് അധികൃതർ അറിയിച്ചു. ഈ സീസണിലെ ശൈത്യ മാസങ്ങളിൽ അൽ അവീറിലെ താൽക്കാലിക ക്യാംപുകൾക്കായി നിയുക്ത സ്ഥലം കുടുംബങ്ങൾക്കും വ്യക്തികൾക്കും 'ദുബൈയുടെ തനത് മരുഭൂ പ്രകൃതി' ആസ്വദിക്കാൻ സുരക്ഷിതവും സുസജ്ജവുമായ അന്തരീക്ഷം പ്രദാനം ചെയ്യും.

ക്യാംപിങ് സീസൺ കുറഞ്ഞത് മൂന്ന് മാസത്തേയ്ക്കും പരമാവധി ആറ് മാസത്തേയ്ക്കുമായാണ് പെർമിറ്റുകൾ നൽകുന്നത്. ഒരു ക്യാംപിന് പരമാവധി 400 ചതുരശ്ര മീറ്റർ വിസ്തീർണത്തിന് ഒരു ചതുരശ്ര മീറ്ററിന് 44 ഫിൽസ് വീതമാകും പ്രതിവാര പെർമിറ്റ് ഫീസ്. ദുബൈ മുനിസിപ്പാലിറ്റി സമർപ്പിത വാണിജ്യ മേഖലകൾ ഇവിടെ സ്ഥാപിച്ചിട്ടുണ്ട്. ക്യാംപിങ് സപ്ലൈകളും അനുബന്ധ സേവനങ്ങളുമടക്കമുള്ള പ്രാദേശിക ബിസിനസുകൾ ക്യാംപിങ് ഏരിയകളിൽ നടത്താൻ പെർമിറ്റിന് അപേക്ഷിക്കാം. ക്യാംപ് സജ്ജീ കരിക്കാനുള്ള അതിരുകളും നിർദിഷ്ട ആവശ്യകതകളും വിവരിച്ച് അതോറിറ്റി അപേക്ഷകർക്ക് പെർമിറ്റ് നൽകും. പെർമിറ്റ് ഉടമകൾക്ക് അവരുടെ സുരക്ഷാ ചട്ടങ്ങൾ പാലിക്കുകയും ക്യാംപിങ്, കുടുംബവുമായി ബന്ധപ്പെട്ട ഇവന്റുകൾ എന്നിവയിലേക്ക് പ്രവർത്തനങ്ങൾ പരിമിതപ്പെടുത്തുകയും ചെയ്താൽ, അനുവദിച്ച സ്ഥലത്തിനുള്ളിൽ ക്യാംപുകൾ രൂപകൽപന ചെയ്യാൻ കഴിയും. ക്യാംപുകൾ വേലി കെട്ടിയിരിക്കണം. കൂടാതെ, അനുമതിയുടെ പരിധിക്ക് പുറത്തുള്ള അനധികൃത ഉപയോഗമോ ഘടനകളോ അനുവദിക്കുന്നതല്ല.

ക്യാംപിങ് സ്ഥലങ്ങളിൽ പടക്കങ്ങൾ നിരോധിച്ചിട്ടുണ്ട്. മറ്റ് സുരക്ഷാ ആവശ്യകതകളിൽ പൊതുജനാരോഗ്യ, സുരക്ഷാ മാനദണ്ഡങ്ങൾ പാലിക്കൽ ഉൾപ്പെടുന്നു. സൈറ്റ് ശുചിത്വം പാലിക്കുക, അഗ്നിശമന ഉപകരണങ്ങളുടെ നിർബന്ധിത ഉപയോഗം ഉൾപ്പെടെയുള്ള നടപടികൾ; ക്യാംപിങ് ഏരിയയ്ക്കുള്ളിൽ ബൈക്കുകൾക്ക്-മണിക്കൂറിൽ 20 കിലോമീറ്റർ വേഗ പരിധി, ഫ്ലാഷ് ലൈറ്റുകളുടെയും ഉച്ചഭാഷിണികളുടെയും നിരോധനം എന്നിവയും ഇതിലുൾപ്പെടുന്നു.

ദുബൈ മുനിസിപ്പാലിറ്റി വെബ്സൈറ്റ്, ദുബൈ നൗ ആപ്പ്, ദുബൈ ബിൽഡിംഗ് പെർമിറ്റ് സിസ്റ്റം എന്നിവ വഴി അപേക്ഷകൾ സമർപ്പിക്കാനാകുമെന്നും ഇതുസംബന്ധിച്ച റിപ്പോർട്ടിൽ പറഞ്ഞു.

കൂടൂതൽ ​ഗൾഫ് വാർത്തകളറിയാൻ ഈ ഗ്രൂപ്പിൽ ജോയിൻ ചെയ്യുക