പാനൂര്‍:വേനല്‍മഴയോടൊപ്പമെത്തിയ ചുഴലിക്കാറ്റും മിന്നലും പാനൂര്‍ മേഖലയില്‍ കനത്ത നാശം വിതച്ചു. ഇന്നലെ പുലര്‍ച്ചെ മഴക്കൊപ്പമുണ്ടായ മിന്നല്‍ കനത്ത നാശം വരുത്തി.
പുത്തൂര്‍ കണ്ണങ്കോട് ചെറുവടത്ത് കണ്ടിയില്‍ രാജീവന്റെ അടുക്കള ചുമരില്‍ മിന്നലേറ്റു ദ്വാരമുണ്ടായി. പുറത്ത് ഗ്യാസ് സിലിന്‍ഡര്‍ ഘടിപ്പിച്ച സ്ഥലത്തെ ചുമര്‍ പാടെ തുരന്ന് നീക്കിയ അവസ്ഥയാണുള്ളത്.
ഗ്യാസ് സിലിന്‍ഡറുകള്‍ക്ക് ഒന്നും സംഭവിക്കാത്തതിനാലും വീട്ടില്‍ ആളില്ലാതിരുന്നതിനാലും വന്‍ ദുരന്തമാണ് ഒഴിവായത്.
വീടിന്റെ ചുമരില്‍ സ്ഥാപിച്ച ഇലക്ട്രോണിക്ക് മീറ്ററും കത്തിനശിച്ചു.വൈദ്യുത ബന്ധവും താറുമാറായി. വീട്ടുമുറ്റത്ത് വന്‍ കുഴിയും രൂപപ്പെട്ടിട്ടുണ്ട്. സമീപത്തെ രവിയുടെ വീട്ടിലെ ഇലക്ട്രോണിക്‌സ് ഉപകരണങ്ങളും നശിച്ചു. ചമ്പാട് അരയാക്കൂലിലെ എരഞ്ഞിക്കല്‍ ഗംഗന്റെ വീടിനും കഴിഞ്ഞ ദിവസം രാത്രിയുണ്ടായ ഇടിമിന്നലില്‍ നാശനഷ്ടമുണ്ടായി. ശക്തമായ മിന്നലില്‍ ഇലക്ട്രോണിക്ക് മീറ്റര്‍ കത്തി നശിച്ചു. വീടിനുള്ളിലെ വയറിങും തകര്‍ന്നു. സീലിങ് തകര്‍ന്ന് ഗംഗന് പരുക്കേല്‍ക്കുകയും ചെയ്തു. സൗത്ത് അണിയാരത്തെ മലയന്റവിട നബീസവിന്റെ വീടിനും കഴിഞ്ഞ ദിവസം മിന്നലില്‍ കേടുപാട് സംഭവിച്ചു. കൂരാറ വയലിന് സമീപത്തെ പുന്നക്കണ്ടി സാവിത്രിയുടെ പറമ്പിലെ തെങ്ങിന്റെ മുകള്‍ഭാഗം മിന്നലില്‍ നിലം പൊത്തി. തെങ്ങിന്റെ ഒരു ഭാഗം കടപുഴകി.