ആലക്കോട്: ഹയര്‍ സെക്കന്‍ഡറി പരീക്ഷയില്‍ നൂറുമേനി വിജയം നേടി ചപ്പാരപ്പടവ് ഹയര്‍ സെക്കന്‍ഡറി സ്‌കൂള്‍ മലയോരത്തിന് അഭിമാനമായി. 139 കുട്ടികള്‍ പരീക്ഷ എഴുതിയതില്‍ 11 കുട്ടികള്‍ മുഴുവന്‍ വിഷയത്തിലും എ പ്ലസ് നേടി.
ചരിത്രത്തിലാദ്യമായാണ് ഹയര്‍ സെക്കന്‍ഡറി വിഭാഗത്തില്‍ നൂറ് ശതമാനം വിജയം മലയോരത്തിന് സ്വന്തമാകുന്നത്. 1960ല്‍ ഹൈസ്‌കൂള്‍ ആയി തുടങ്ങി 2010ല്‍ ഹയര്‍സെക്കന്‍ഡറി ആയി ഉയര്‍ത്തപ്പെട്ട ചപ്പാരപടവ് സ്‌കൂളില്‍ കഴിഞ്ഞ വര്‍ഷം കൊമേഴ്‌സ് പരീക്ഷ എഴുതിയ മുഴുവന്‍ പേരും വിജയിച്ചിരുന്നു. പാഠ്യ പാഠ്യേതര പ്രവര്‍ത്തികളിലും സ്‌കൂള്‍ സജീവ സാന്നിധ്യമാണ്. വിജയം നേടിയ വിദ്യാര്‍ഥികളെയും അധ്യാപകരെയും മാനേജ്‌മെന്റും പി.ടി.എയും അഭിനന്ദിച്ചു.