നെട്ടൂര്‍: പ്രൈമറി ഹെല്‍ത്ത് സെന്ററില്‍ ഉച്ചയ്ക്കു ശേഷം ഒ.പിയുടെ പ്രവര്‍ത്തനം നിറുത്തിയതില്‍ പ്രതിഷേധം ശക്തമായി. ഉച്ചകഴിഞ്ഞ് ഇവിടെ എന്‍.ആര്‍.എച്ച്.എം ഡോക്ടറാണ് രോഗികളെ പരിശോധിച്ചിരുന്നത്. എന്നാല്‍ ഒരാഴ്ചയായി ഡോക്ടര്‍ ഇല്ലാത്തതിനാല്‍ നെട്ടൂര്‍, മാടവന, വളന്തകാട് കുമ്പളം പ്രദേശങ്ങളില്‍ നിന്നുള്ള രോഗികള്‍ ബുദ്ധിമുട്ടിലായിരിക്കുകയാണ്.
ഡോക്ടര്‍മാരുടെ സേവനം മുഴുവന്‍ സമയവും ലഭ്യമല്ലാത്തതിനാല്‍ ഇവിടെ ഐ.പി വാര്‍ഡും ഒഴിഞ്ഞു കിടക്കുകയാണ്. ഇവിടെ തെരുവുനായകളുടെ സങ്കേതമായി മാറിയിരിക്കുകയാണ്. ആശുപത്രി വികസനം സംബന്ധിച്ച് രണ്ടാഴ്ച മുമ്പ് നഗരസഭയില്‍ നടന്ന എം.എല്‍.എ, നഗരസഭ ചെയര്‍പേഴ്‌സണ്‍, കൗണ്‍സിലര്‍മാര്‍ നെട്ടൂര്‍ വികസന സമിതി പ്രവര്‍ത്തകര്‍ തുടങ്ങിയവര്‍ പങ്കെടുത്ത യോഗത്തില്‍ ആശുപത്രി വികസനം സംബന്ധിച്ച മാസ്റ്റര്‍ പ്ലാന്‍ തയാറാക്കുന്നതിന് തീരുമാനമായിരുന്നു.
അതിനിടെയാണ് നിരവധി രോഗികള്‍ ചികിത്സ തേടിയെത്തുന്ന ഉച്ചകഴിഞ്ഞുള്ള ഒ.പി നിലച്ചത്. ഇത് പ്രദേശവാസികളുടെ പ്രതിഷേധത്തിനിടയാക്കിയിരിക്കുകയാണ്.
ഉച്ചയ്ക്കുശേഷം ഡോക്ടറെ നിയമിച്ച് ഒ പി പുനസ്ഥാപിക്കുക, കിടത്തി ചികിത്സ പുനരാരംഭിക്കുന്നതിന് ആവശ്യമായ സംവിധാനങ്ങള്‍ ഏര്‍പ്പെടുത്തുക, തെരുവുനായ്ക്കളുടെ ശല്യം ഒഴിവാക്കുക തുടങ്ങിയ ആവശ്യങ്ങള്‍ ഉന്നയിച്ച് സി.പി.ഐ മരട് ലോക്കല്‍ കമ്മിറ്റിയുടെ ആഭിമുഖ്യത്തില്‍ ആശുപത്രിക്കു മുന്നില്‍ നടത്തിയ പ്രതിഷേധ പ്രകടനവും നില്‍പ്പു സമരവും നടത്തി.
മണ്ഡലം സെക്രട്ടറി പി.വി ചന്ദ്രബോസ് ഉദ്ഘാടനം ചെയ്തു. മരട് ലോക്കല്‍ കമ്മിറ്റി സെക്രട്ടറി ഏ.ആര്‍ പ്രസാദ് അധ്യക്ഷനായി. ജില്ലാ കമ്മിറ്റി അംഗം എ.കെ സജീവന്‍, മത്സ്യത്തൊഴിലാളി ഫെഡറേഷന്‍ ജില്ല സെക്രട്ടറി വി.ഒ ജോണി, മരട് നഗരസഭ സ്റ്റാന്റിങ് കമ്മറ്റി ചെയര്‍പേഴ്‌സണ്‍ ദിഷ പ്രതാപന്‍, അഡ്വ. ടി.ബി ഗഫൂര്‍, പി.ബി വേണുഗോപാല്‍ എന്നിവര്‍ പ്രസംഗിച്ചു. എ.എം മുഹമ്മദ്, കെ.എക്‌സ് മാത്തന്‍, കെ.ബി സുബീഷ് ലാല്‍, എന്‍.ഡി. വാസുദേവന്‍, എ.കെ.കാര്‍ത്തികേയന്‍, കെ.വി.ലാലന്‍, കെ.കെ ജയേഷ്, എം.ടി സന്തോഷ്, പി.കെ ഷാജി, എ.എസ് വിനീഷ് എന്നിവര്‍ സമരത്തിന് നേതൃത്വം നല്‍കി.