തിരുവനന്തപുരം: സ്വാശ്രയ കോളജ് അധ്യാപകരുടെയും ജീവനക്കാരുടെയും സുരക്ഷിതത്വം ഉറപ്പാക്കുക, മാനേജ്‌മെന്റിന്റെ ചൂഷണം അവസാനിപ്പിക്കുക തുടങ്ങിയ ആവശ്യങ്ങള്‍ ഉന്നയിച്ച് സെല്‍ഫ് ഫിനാന്‍സിങ് കോളജ് ടീച്ചേഴ്‌സ് ആന്‍ഡ് സ്റ്റാഫ് അസോസിയേഷന്റെ (എസ്.എഫ്.സി.ടി.എസ്.എ) നേതൃത്വത്തില്‍ സെക്രട്ടേറിയറ്റ് പടിക്കല്‍ അനിശ്ചിതകാല നിരാഹാരസമരം തുടങ്ങി.
മുന്‍ മന്ത്രിയും കെ.ടി.ഡി.സി ചെയര്‍മാനുമായ എം. വിജയകുമാര്‍ ഉദ്ഘാടനം ചെയ്തു. കേരളത്തില്‍ സ്വാശ്രയ വിദ്യാഭ്യാസ രംഗത്ത് ഏറ്റവും കൂടുതല്‍ ചൂഷണം നടക്കുന്നതായി അദ്ദേഹം പറഞ്ഞു. അസോസിയേഷന്‍ സംസ്ഥാന പ്രസിഡന്റ് കെ.എന്‍ ബാലഗോപാല്‍ അധ്യക്ഷനായി. സി. പി നാരായണന്‍ എം. പി, അസോസിയേഷന്‍ ജനറല്‍ സെക്രട്ടറി എ. അബ്ദുല്‍ വഹാബ് പ്രസംഗിച്ചു.