ന്യൂഡല്‍ഹി: പഞ്ചാബ് തെരഞ്ഞെടുപ്പ് വിജയത്തിനുശേഷം ഗുജറാത്ത് നിയമസഭാ തെരഞ്ഞെടുപ്പിലും തങ്ങള്‍ക്കുവേണ്ടി പ്രവര്‍ത്തിക്കാന്‍ തെരഞ്ഞെടുപ്പ് വിദഗ്ധന്‍ പ്രശാന്ത് കിഷോറിനോട് കോണ്‍ഗ്രസ് ആവശ്യപ്പെട്ടു. ഉത്തര്‍പ്രദേശ് തെരഞ്ഞെടുപ്പില്‍ ദയനീയ പരാജയം നേരിട്ട പശ്ചാത്തലത്തില്‍ അദ്ദേഹത്തിനെതിരേ വ്യാപകമായ വിമര്‍ശനം ഉയര്‍ന്നിരുന്നു. എന്നാല്‍ ഇക്കാര്യം അവഗണിച്ചുകൊണ്ടാണ് ഗുജറാത്ത് തെരഞ്ഞെടുപ്പിലും തന്ത്രങ്ങള്‍ ആവിഷ്‌കരിക്കാന്‍ പ്രശാന്ത് കിഷോറിനോട് കോണ്‍ഗ്രസ് നേതൃത്വം ആവശ്യപ്പെട്ടത്. ഈ വര്‍ഷം ഡിസംബറിലാണ് ഗുജറാത്തില്‍ തെരഞ്ഞെടുപ്പ് നടക്കുന്നത്. കോണ്‍ഗ്രസ് നേതാവ് ശങ്കര്‍ സിങ് വഗേല ഇതിനകം തന്നെ പ്രശാന്ത് കിഷോറിന്റെ സഹായം ലഭ്യമാക്കാന്‍ നേതൃത്വത്തോട് ആവശ്യപ്പെടുകയും ചെയ്തിട്ടുണ്ട്. ഗുജറാത്തില്‍ ബി.ജെ.പിയെ പരാജയപ്പെടുത്തുകയെന്നത് സാഹസമല്ലെന്നും അത് തങ്ങള്‍ സാധ്യമാക്കുമെന്നും അദ്ദേഹം ട്വീറ്റ് ചെയ്തിട്ടുണ്ട്.