കൊച്ചി: ഫെഫ്കയുടെ നേതാക്കളായ ബി. ഉണ്ണികൃഷ്ണനും സിബി മലയിലും സൂപ്പര്‍ താരങ്ങളുടെ ഗുണ്ടകളായാണ് പ്രവര്‍ത്തിക്കുന്നതെന്ന് സംവിധായകന്‍ വിനയന്‍. തനിക്ക് അനുകൂലമായുള്ള കോംപറ്റീഷന്‍ കമ്മിഷന്‍ വിധി സത്യത്തിന്റെ വിജയമാണെന്നും വിനയന്‍ പറഞ്ഞു. എറണാകുളം പ്രസ്‌ക്ലബ്ബില്‍ വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം. തന്റെ വിജയം അനീതികള്‍ക്കെതിരെ പോരാടാന്‍ പുതുതലമുറയ്ക്ക് ധൈര്യം പകര്‍ന്നിരിക്കുകയാണ്. ഈ വിജയം സിനിമ സംഘടനകളായ അമ്മയും ഫെഫ്കയും മരണംവരെ പീഡിപ്പിച്ച നടന്‍ തിലകന് സമര്‍പ്പിക്കുകയാണ്. അമ്മയും ഫെഫ്കയും കാരണം തനിക്ക് എട്ടര വര്‍ഷമാണ് നഷ്ടപ്പെട്ടത്. സൂപ്പര്‍ താരങ്ങളടക്കമുള്ള സംഘടന നേതാക്കള്‍ ഇനിയെങ്കിലും അഹങ്കാരവും ഫാസിസ്റ്റ് രീതിയും അവസാനിപ്പിക്കണമെന്നും വിനയന്‍ആവശ്യപ്പെട്ടു.