കാഞ്ഞങ്ങാട്: ടൂറിസ്റ്റ് ബസില്‍നിന്നു മോഷ്ടിച്ച ഒന്നര ലക്ഷം രൂപയുടെ സാധനങ്ങളുമായി ഓട്ടോയില്‍ സഞ്ചരിക്കുകയായിരുന്ന മൂന്നുപേരെ ഹൊസ്ദുര്‍ഗ് പൊലിസ് അറസ്റ്റ് ചെയ്തു. കുമ്പള ദേവി നഗറിലെ അബ്ദുല്‍ നിസാര്‍(24), ബദ്‌രിയ നഗറിലെ അബ്ദുല്‍ നാസര്‍ (21), കൊടിയമ്മയിലെ മുഹമ്മദ് നിസാര്‍ (24) എന്നിവരെയാണ് ഇന്നലെ പുലര്‍ച്ചെ മാവുങ്കാല്‍ മൂലക്കണ്ടത്ത് വച്ച് പൊലിസ് അറസ്റ്റ് ചെയ്തത്. ഇവര്‍ സഞ്ചരിച്ച കെ.എല്‍ 14 ആര്‍ 4190 നമ്പര്‍ ഓട്ടോറിക്ഷയും പൊലിസ് കസ്റ്റഡിയില്‍ എടുത്തു. പടന്നക്കാട്ട് നിര്‍ത്തിയിട്ട ഉപാസന ടൂറിസ്റ്റ് ബസില്‍നിന്നു സ്റ്റീരിയോ ഉള്‍പ്പെടെ ഒന്നരലക്ഷം രൂപയുടെ സാധന സാമഗ്രികള്‍ ഇന്നലെ രാത്രി മോഷണം പോയിരുന്നു. ഇവ ഓട്ടോയില്‍ കടത്തുന്നതിനിടെയാണ് പ്രതികള്‍ പിടിയിലായത്. അറസ്റ്റിലായവര്‍ക്ക് ഒട്ടനവധി മോഷണ കേസുകളില്‍ ബന്ധമുള്ളതായി പൊലിസ് പറഞ്ഞു.