36 വര്‍ഷത്തെ കാത്തിരിപ്പിന് വിരാമമിട്ട് പെറു ടീം ലോകകപ്പ് മാമാങ്കത്തിനായി റഷ്യയിലെത്തുന്നു. 1982ലാണ് ടീം അവസാനമായി ലോകകപ്പിന്റെ ഫൈനല്‍ റൗണ്ടില്‍ മത്സരിക്കാനിറങ്ങിയത്. അവരുടെ അഞ്ചാം ലോകകപ്പാണിത്. 1930, 1970, 78, 82 വര്‍ഷങ്ങളിലാണ് നേരത്തെ സാന്നിധ്യമറിയിച്ചത്. 1970ല്‍ ക്വാര്‍ട്ടര്‍ ഫൈനല്‍ വരെ എത്തിയതാണ് മികച്ച പ്രകടനം. ഫിഫ റാങ്കിങില്‍ 11ാം സ്ഥാനത്താണ് പെറു.
യോഗ്യതാ പോരാട്ടത്തിന്റെ കടമ്പകളും പിന്നീട് ന്യൂസിലന്‍ഡിനെതിരേ പ്ലേയോഫ് നൂല്‍പ്പാലവും കടന്നാണ് പെറു ഇത്തവണ യോഗ്യത പിടിച്ചെടുത്തത്. കരുത്തരായ ചിലിയുടെ ലോകകപ്പ് ഫൈനല്‍ റൗണ്ട് സ്വപ്നങ്ങള്‍ തകര്‍ത്താണ് പെറു എത്തുന്നത് എന്നതും ശ്രദ്ധേയമാണ്.
അര്‍ജന്റീനക്കാരന്‍ റിക്കാര്‍ജോ അല്‍ബര്‍ട്ടോ ഗരേസയാണ് ടീമിന്റെ മാനേജര്‍. 2015 മുതല്‍ ടീമിനൊപ്പമുള്ള പരിശീലകന്റെ മികവ് കൂടിയാണ് ടീമിന്റെ ഇടവേളയ്ക്ക് ശേഷമുള്ള ലോകകപ്പ് പ്രവേശം.
34കാരനായ പ്രതിരോധ താരം അല്‍ബര്‍ട്ട് റോഡ്രിഗസാണ് ടീമിന്റെ നായകന്‍. ടീമിനായി ഏറ്റവും കൂടുതല്‍ മത്സരിച്ച താരം ജെഫേഴ്‌സന്‍ എര്‍ഫാനാണ് നിര്‍ണായക താരം. സ്‌ട്രൈക്കറായ താരം 81 മത്സരങ്ങളാണ് പെറുവിനായി കളിച്ചിട്ടുള്ളത്. നിലവില്‍ ലോകോമോട്ടീവ് മോസ്‌ക്കോയുടെ താരം കൂടിയാണ് ജെഫേഴ്‌സന്‍.
മുന്‍ ചാംപ്യന്‍മാരായ ഫ്രാന്‍സ്, ഡെന്‍മാര്‍ക്, ആസ്‌ത്രേലിയ ടീമുകള്‍ ഉള്‍പ്പെട്ട ഗ്രൂപ്പ് സിയിലാണ് പെറു. ഫ്രാന്‍സ് ഒഴികെയുള്ള രണ്ട് ടീമുകളെ കീഴടക്കാനുള്ള കഴിവും പ്രതിഭാ ശേഷിയും പെറുവിനുണ്ട് എന്നതിനാല്‍ അടുത്ത ഘട്ടത്തിലേക്ക് സാധ്യത നിലനില്‍ക്കുന്നുണ്ട്.