മദീന: പ്രവാചക പള്ളിയായ മസ്ജിദുന്നബവിയുടെ ആത്മീയ പൈതൃകവും പവിത്രതയും പൗരാണിക വാസ്തുവിദ്യയും സംരക്ഷിക്കുന്നതിലും വികസിപ്പിക്കുന്നതിലും മുസ്ലീങ്ങള്‍ കാണിച്ച കരുതലും സമര്‍പ്പണവും നിസ്തുലമാണ്. സാഫല്യം തേടി പുണ്യറസൂലിന്റെ ചാരത്തണയാന്‍ ലോകത്തിന്റെ നാനാദിക്കുകളില്‍ നിന്ന് എത്തുന്ന വിശ്വാസികള്‍ക്ക് ചരിത്രത്തിലുടനീളമുള്ള ഈ കരുതല്‍ അനാവൃതമാവും. 

ഇസ്ലാമിക വാസ്തുവിദ്യയുടെ ഭംഗി ഉള്‍ക്കൊള്ളുന്നതാണ് പ്രവാചക പള്ളിയിലെ ചരിത്ര നിര്‍മിതികളും ശേഷിപ്പുകളും. സൗദി ഭരണകൂടം അനുസ്യൂതം നടത്തിവരുന്ന വിപുലീകരണങ്ങളും അടിസ്ഥാന സൗകര്യ വികസനങ്ങളും പ്രവാചക പള്ളിയുടെ പാരമ്പര്യത്തിനും മനോഹാരിതയ്ക്കും കോട്ടം തട്ടാതെയുള്ളതാണ്. ചരിത്രത്തിലുടനീളം മുസ്ലീങ്ങള്‍ പള്ളിയോട് കാണിച്ച ആദരവിനെ ഇത് പ്രതിഫലിപ്പിക്കുന്നു.

റൗള ശരീഫിന് മുകളിലെ പച്ച താഴികക്കുടം മദീന നഗരിയെ തന്നെ അടയാളപ്പെടുത്തുന്ന സവിശേഷതയായി മാറി. നൂറ്റാണ്ടുകളുടെ വികസന പ്രവര്‍ത്തനങ്ങള്‍ തുടര്‍ന്നപ്പോഴും ഇവിടം പ്രധാന ലാന്‍ഡ്മാര്‍ക്കായി നിലകൊണ്ടു. തുടര്‍ച്ചയായ വികസന പ്രവര്‍ത്തനങ്ങള്‍ നടന്ന പ്രവാചക പള്ളിയുടെ തെക്കുകിഴക്കന്‍ വശം, യുഗങ്ങളിലുടനീളം ഇസ്ലാമിക വാസ്തുവിദ്യയുടെ ശ്രദ്ധേയമായ ഒരു ഉദാഹരണമാണ്. ഇവിടുത്തെ പേരുകേട്ട ഖൈത്‌ബേ മിനാരം കറുത്ത കല്ലുകളും സങ്കീര്‍ണമായ അലങ്കാര രൂപങ്ങളും കൊണ്ട് കാലഘട്ടത്തിലെ കലാപരമായ ശൈലിയെ പ്രതിഫലിപ്പിക്കുന്നു.

പൗരാണിക സ്വത്വം പേറുന്ന അല്‍-സലാം ഗേറ്റിനടുത്തുള്ള തെക്കുപടിഞ്ഞാറന്‍ മിനാരവും മറ്റൊരു ചരിത്ര സ്മാരകമാണ്. ഒരുകാലത്ത് മര്‍വാന്‍ ഇബ്‌നു അല്‍-ഹക്കാമിന്റെ വീട് എന്നറിയപ്പെട്ടിരുന്ന പ്രദേശമാണിത്. പള്ളിയുടെ കിഴക്കും തെക്കും വശങ്ങള്‍ ശക്തമായ കല്ല് ആര്‍ക്കേഡുകളും മുറ്റങ്ങളും കൊണ്ട് സവിശേഷമായിരുന്നു. ആദ്യത്തെ ഏറ്റവും വലിയ വിപുലീകരണ പ്രവര്‍ത്തനങ്ങള്‍ നടന്ന ഹിജ്‌റ 1372 വരെ ഈ ഘടനകള്‍ നിലനിന്നു. 

പ്രവാചകന്റെ ഖബറിടത്തിനും പ്രസംഗപീഠത്തിനും ഇടയില്‍ സ്ഥിതി ചെയ്യുന്ന റൗള ഷെരീഫിന്റെ ഭാഗങ്ങളും ചരിത്രപരമായ കരകൗശല വൈദഗ്ധ്യവും അതുല്യമായ വാസ്തുവിദ്യാ സൗന്ദര്യവും പ്രതിഫലിപ്പിക്കുന്നു. 

English summary : The historical monuments of the Prophet’s Mosque (Al-Masjid an-Nabawi) in Madinah stand as breathtaking examples of Islamic architecture, reflecting the deep reverence and dedication of Muslims throughout history. The continuous infrastructure developments by the Saudi government have successfully preserved the mosque's spiritual heritage, sanctity, and ancient structural beauty.