മെല്‍ബണ്‍: സീസണിലെ ആദ്യ ഫോര്‍മുല വണ്‍ കിരീടം ഫെരാരിയുടെ ജര്‍മന്‍ ഡ്രൈവര്‍ സെബാസ്റ്റ്യന്‍ വെറ്റലിന്. ഫോര്‍മുല വണ്‍ സീസണിനു തുടക്കം കുറിച്ച് നടന്ന ആസ്‌ത്രേലിയന്‍ ഗ്രാന്‍ പ്രിയിലാണു വെറ്റല്‍ കിരീടം നേടിയത്.
പോള്‍ പൊസിഷനില്‍ മത്സരിച്ച മെഴ്‌സിഡസിന്റെ ലൂയീസ് ഹാമില്‍ട്ടനെ രണ്ടാം സ്ഥാനത്തേക്കും മെഴ്‌സിഡസിന്റെ പുതിയ ഡ്രൈവര്‍ വല്‍ട്ടേരി ബോട്ടാസിനെ മൂന്നാം സ്ഥാനത്തേക്കും പിന്തള്ളിയാണു വെറ്റല്‍ കുതിച്ചത്. ഫെരാരിയുടെ തന്നെ കിമി റൈക്കോണന്‍ നാലാം സ്ഥാനത്തും റെഡ് ബുള്‍ താരം മാക്‌സ് വെര്‍സ്റ്റപ്പന്‍ അഞ്ചാമതും വില്ല്യംസിന്റെ ഫിലിപ്പെ മാസ ആറാമതും എത്തി. ഫോഴ്‌സ് ഇന്ത്യയുടെ സെര്‍ജിയോ പെരസ് ഏഴാം സ്ഥാനത്തും മറ്റൊരു ഡ്രൈവര്‍ എസ്റ്റബന്‍ ഒക്കോണ്‍ 10ാം സ്ഥാനത്തും ഫിനിഷ് ചെയ്തു.
2007ല്‍ കിമി റൈക്കോണന്‍ ആസ്‌ത്രേലിയന്‍ ഗ്രാന്‍ പ്രിയില്‍ വിജയിച്ച ശേഷം ഫെരാരി ഇവിടെ നേടുന്ന രണ്ടാമത്തെ കിരീടമാണിത്. 2011ല്‍ റെഡ് ബുള്ളിനൊപ്പം ഇവിടെ കിരീടം നേടിയ വെറ്റല്‍ ആറു വര്‍ഷങ്ങള്‍ക്കു ശേഷം വീണ്ടും ആസ്‌ത്രേലിയന്‍ സര്‍ക്യൂട്ടില്‍ ചാംപ്യന്‍ പട്ടം സ്വന്തമാക്കി.