കണ്ണൂര്‍: എസ്.എസ്.എല്‍.സി കണക്ക് ചോദ്യപേപ്പര്‍ ചോര്‍ച്ചയുടെ ധാര്‍മിക ഉത്തരവാദിത്വം ഏറ്റെടുത്ത് വിദ്യാഭ്യാസ മന്ത്രി പ്രൊഫ. രവീന്ദ്രനാഥ് രാജിവയ്ക്കണമെന്നാവശ്യപ്പെട്ട് എം.എസ്.എഫ് ജില്ലാ കമ്മിറ്റി സംഘടിപ്പിച്ച സമരത്തില്‍ പൊലിസ് അതിക്രമം. പ്രതിഷേധിച്ച പ്രവര്‍ത്തകരെ അറസ്റ്റു ചെയ്തു നീക്കി. ജില്ലാ പ്രസിഡന്റ് സി.കെ നജാഫ്, സെക്രട്ടറി ഒ.കെ ജാസിര്‍, ഹാസിഫ് തുടങ്ങി പന്ത്രണ്ടോളം പേര്‍ക്കെതിരെ കേസെടുത്തു.
 രാവിലെ ഒന്‍പതിനു ഡി.ഡി.ഇ ഓഫിസ് പടിക്കല്‍ സമാധാനപരമായി കുത്തിയിരിപ്പ് സമരം നടത്തുകയായിരുന്ന പ്രവര്‍ത്തകരെയാണ് പ്രകോപനമില്ലാതെ പൊലിസെത്തി മര്‍ദിച്ച് അറസ്റ്റു ചെയ്തു നീക്കിയത്. തുടര്‍ന്ന് എം.എസ്.എഫ് നേതാക്കളായ എം.പി നവാസ്, ഫൈസല്‍ ചെറുകുന്നോന്‍, അന്‍സാരി തില്ലങ്കേരി, എം.പി മുഹമ്മദലി തുടങ്ങിയവരെത്തി അറസ്റ്റ് ചെയ്തവരെ മോചിപ്പിച്ചു. എം.എസ്.എഫ് നേതാക്കളും പ്രവര്‍ത്തകരുമടങ്ങുന്ന സംഘം കലക്ടറേറ്റിലേക്ക് മാര്‍ച്ച് നടത്തി. എം.എസ്.എഫ് സംസ്ഥാന നേതാവ് എം.പി നവാസ് ഉദ്ഘാടനം ചെയ്തു. ജില്ലാ പ്രസിഡന്റ് സി.കെ നജാഫ് അധ്യക്ഷനായി. ചോര്‍ന്ന ചോദ്യപേപ്പര്‍ കലക്ടറേറ്റിനു മുന്നില്‍ പ്രതീകാത്മകമായി കത്തിച്ചു. ജില്ലാ സെക്രട്ടറി ഒ.കെ ജാസിര്‍, മുഹമ്മദ് കുഞ്ഞി, പി നസീര്‍, ഇജാസ് ആറളം, ഷുഹൈബ് കൊതേരി സംസാരിച്ചു.