കോഴിക്കോട്: ഇന്റര്‍നാഷനല്‍ കയാക്കിങ് ചാംപ്യന്‍ഷിപ്പിന് ഇത്തവണ കോഴിക്കോട് വേദിയാകും. ജൂലൈ പതിനെട്ടുമുതല്‍ ഇരുപത്തിയൊന്നുവരെ നടക്കുന്ന ചാംപ്യന്‍ഷിപ്പില്‍ പതിനെട്ടുരാജ്യങ്ങളില്‍ നിന്നായി പ്രശസ്ത താരങ്ങള്‍ പങ്കെടുക്കും.
കോടഞ്ചേരി, പുലിക്കയം, ഇരുവഞ്ഞിപ്പുഴ, മീന്‍തുള്ളിപ്പാറ എന്നിവിടങ്ങളിലാണ് പരിപാടി സംഘടിപ്പിക്കുന്നത്.
അഞ്ചുവര്‍ഷമായി കയാക്കിങ് നടന്നിട്ടുണ്ടെങ്കിലും ഇന്റര്‍നാഷനല്‍ ചാംപ്യന്‍ഷിപ്പിന് അദ്യമായിട്ടാണ് കേരളത്തില്‍ വേദിയൊരുങ്ങുന്നത്. ഏഷ്യയില്‍ തന്നെ ആദ്യമായിട്ടാണ് ഇത്തരം ഒരു ചാംപ്യന്‍ഷിപ്പ് നടക്കുന്നത്.
കയാക്കിങ്ങിനോട് അനുബന്ധിച്ച് ഓഫ് റോഡിങ്, മൗണ്ടന്‍ ബൈക്കിങ്, നാടന്‍ ഭക്ഷണശാലകള്‍ എന്നിവയും ഉണ്ടാകും. പ്രാദേശിക തലത്തിലുള്ളവരുടെ പൂര്‍ണ പിന്തുണയോട് കൂടിയാണ് ഇത്തരമൊരു പരിപാടി സംഘടിപ്പിക്കുന്നത്. കലക്ടറേറ്റ് ചേമ്പറില്‍ നടന്ന യോഗത്തില്‍ കോഴിക്കോട് കലക്ടര്‍ യു.വി ജോസ്, റോഷന്‍ കൈനടി (ജി.എം.ഐ), റാവിസ് കാലിക്കറ്റ് ജനറല്‍ മാനേജര്‍ അജിത്ത് നായര്‍, ടൂറിസം ജോയിന്റ് ഡയറക്ടര്‍ സി.എന്‍ അനിതകുമാരി തുടങ്ങിയവര്‍ പങ്കെടുത്തു.