.

ചാവക്കാട്: എം.പി യും, എം.എല്‍.എയും തീരദേശവാസികളോട് കാട്ടുന്നത് കടുത്ത വഞ്ചനയാണന്ന് മുസ്‌ലിം ലീഗ് സംസ്ഥാന സെക്രട്ടറി സി.എച്ച് റഷീദ് ആരോപിച്ചു.
കടപ്പുറം പഞ്ചായത്തിലും, പുന്നയൂര്‍കുളം, പഞ്ചായത്തിലും തീരദേശത്ത് കടല്‍ ക്ഷോഭം രൂക്ഷമായിട്ടും ഒന്നു തിരിഞ്ഞു നോക്കാന്‍ പോലും ഇവര്‍ തയാറായിട്ടില്ല. കടപ്പുറം പഞ്ചായത്തിലെ മൂസറോഡ, അഞ്ചങ്ങാടി വളവ്, വെളിച്ചെണ്ണപടി, മുനക്കകടവ്, അഴിമുഖം, തൊട്ടാപ്പ് പ്രദേശങ്ങളിലും പുന്നയൂര്‍കുളം പഞ്ചായത്തിന്റെ അണ്ടത്തോട് ബീച്ച്, പെരിയമ്പലം, തങ്ങള്‍പടി ബീച്ച്, പ്രദേശങ്ങളിലുമാണ് കടല്‍ ക്ഷോഭം രൂക്ഷമായിട്ടുള്ളത്. ഓഖി ദുരന്ത വേളയില്‍ ശക്തമായ കടല്‍ക്ഷോഭം അനുഭവപ്പെട്ട കടപ്പുറം പഞ്ചായത്തിലെ തീരമേഖലയില്‍ രണ്ടു മന്ത്രിമാര്‍അടക്കം സന്ദര്‍ശനം നടത്തി തീരദേശവാസികള്‍ക്ക് നല്‍കിയ വാഗ്ദാനങ്ങള്‍ ഒന്നും തന്നെ പാലിച്ചില്ലന്ന് റഷീദ് കുറ്റപ്പെടുത്തി.
പുന്നയൂര്‍കുളം, പഞ്ചായത്തിലെ കടല്‍ ക്ഷോഭ മേഖലയില്‍ മുസ്‌ലിം ലീഗ് സംസ്ഥാന സെക്രട്ടറി സി എച്ച് റഷീദ് സന്ദര്‍ശനം നടത്തി. ജില്ലാ വൈസ് പ്രസിഡന്റ് വി കെ. മുഹമ്മദ്, മണ്ഡലം ജനറല്‍ സെക്രട്ടറി എ.കെ അബ്ദുല്‍ കരീം, വൈസ് പ്രസിഡന്റ് മന്ദലംകുന്ന് മുഹമ്മദുണ്ണി, സിക്രട്ടറി ലത്തീഫ് പാലയൂര്‍, പുന്നയൂര്‍കുളം പഞ്ചായത്ത് പ്രിസിഡന്റ് എ.കെ മൊയ്തുണ്ണി, സെക്രട്ടറി സി.എം ഗഫൂര്‍, റാഫി വലിയകത്ത്, ഷംനാദ് പള്ളിപാട്ട്, സി വി ഷക്കീര്‍, ടി എം ഇര്‍ഷാദ്, കെ എം സി സി നേതാവ് ഹുസൈന്‍ വലിയകത്ത് അദ്ദേഹത്തോടൊപ്പം ഉണ്ടായിരുന്നു.