മനാമ: ബഹ്‌റൈനില്‍ നടന്ന ദേശീയതല ഖുര്‍ആന്‍ മനപാഠ മത്സരത്തില്‍ മലയാളിയായ പതിനാറുകാരന്‍ ദര്‍വീശ് അലിക്ക് ഒന്നാം സ്ഥാനം. ബഹ്‌റൈന്‍ രാജാവ് ഹമദ് ബിന്‍ ഈസ അല്‍ഖലീഫയുടെ പേരില്‍ നടത്തപ്പെടുന്ന മല്‍സരത്തിലാണ് ഹാഫിളുകളായ 500 പേരെ പിന്തള്ളി കണ്ണൂര്‍ സ്വദേശിയായ ദര്‍വീശ് അലി ഉജ്ജ്വല വിജയം നേടിയത്. ഇന്ന് (ജൂണ്‍ 3, ഞായറാഴ്ച) വൈകിട്ട് 7.15ന് ബഹ്‌റൈനിലെ ഗ്രാന്റ് മസ്ജിദില്‍ നടക്കുന്ന ചടങ്ങില്‍ ദര്‍വീശ് അലിക്കുള്ള അവാര്‍ഡ് ദാനം നടക്കും.

ഹിഫ്‌ള് പഠന കാലത്തു തന്നെ ബഹ്‌റൈനിലെ വിവിധ പള്ളികളിലൂടെ ശ്രുതിമധുരമായി ഖുര്‍ആന്‍ പാരായണം ചെയ്യുന്ന ദര്‍വീശിന്റെ ഖുര്‍ആന്‍ പാരായണം ഇതിനകം ബഹ്‌റൈനിലെ സ്വദേശികള്‍ക്കും വിദേശികള്‍ക്കും ഒരു പോലെ സുപരിചിതമാണ്. റമദാനില്‍ ബഹ്‌റൈനിലെ വിവിധ പള്ളികളിലായി ദീര്‍ഘമായ ഖുര്‍ആന്‍ പാരായണത്തോടെയുള്ള തറാവീഹ്, ഖിയാമുല്ലൈല്‍ നമസ്‌കാരങ്ങള്‍ ദര്‍വീശിന്റെ നേതൃത്വത്തില്‍ നടക്കാറുണ്ട്. ബഹ്‌റൈന്‍ മതകാര്യവകുപ്പിനു കീഴിലുള്ള രാജ്യത്തെ പ്രമുഖ പള്ളികളില്‍ നടക്കുന്ന ഇത്തരം നമസ്‌കാരങ്ങള്‍ ഈ വര്‍ഷവും നടന്നു കൊണ്ടിരിക്കെയാണ് ദര്‍വീശിന്റെ വിജയ വാര്‍ത്ത എത്തിയത്.

വിശുദ്ധ റമദാനില്‍ വിശുദ്ധ ഖുര്‍ആന്‍ ഇറങ്ങിയ മാസം ലഭിച്ച ഈ സന്തോഷ വാര്‍ത്ത തനിക്ക് ഏറെ സന്തോഷം പകരുന്നതാണെന്നും ഖുര്‍ആനിക മേഖലകളില്‍ കൂടുതല്‍ പഠനം നടത്താനാണ് താല്‍പര്യമെന്നും ദര്‍വീശ് അലി പ്രതികരിച്ചു. നേരത്തെ വിവിധ ഭാഷകളിലായി ബഹ്‌റൈനിലെ നിരവധി വേദികളില്‍ പാടിയിരുന്ന ദര്‍വീശ് മാതാപിതാക്കളുടെ നിര്‍ദേശമനുസരിച്ചാണ് വിശുദ്ധ ഖുര്‍ആന്‍ മനപാഠത്തിലേക്കും പാരായണത്തിലേക്കും തിരിഞ്ഞത്.  സ്‌കൂള്‍ പഠനത്തോടൊപ്പം നാലു വര്‍ഷം നീണ്ട കഠിന പ്രയത്‌നത്തിലൂടെയാണ് ദര്‍വീശ് ഖുര്‍ആന്‍ ഹിഫഌ പഠനം പൂര്‍ത്തീകരിച്ചത്. തങ്ങളുടെ മകന് ഇരുലോകത്തും ഗുണകരമായ വഴി വിശുദ്ധ ഖുര്‍ആനിന്റെ വഴിയാണെന്ന തിരിച്ചറിവുണ്ടായതു കൊണ്ടാണ് ഈ മാര്‍ഗത്തിലേക്ക് അവനെ വഴി തിരിച്ചു വിടാനായതും അതില്‍ ഉന്നത വിജയം നേടാനായതുമെന്ന് പണ്ഢിതന്‍ കൂടിയായ മഹ്മൂദ് മുഹമ്മദലി മുസ്‌ല്യാര്‍ ഇവിടെ സുപ്രഭാതത്തോട് പറഞ്ഞു.

കണ്ണൂര്‍ സ്വദേശിയായിരുന്ന  മഹ്മൂദ് മുഹമ്മദലി മുസ്‌ല്യാര്‍ നേരത്തെ പട്ടിക്കാട് ജാമിഅ നൂരിയ്യ അറബിക് കോളേജില്‍ ഉപരിപഠനം നടത്തിയിട്ടുണ്ട്.  ഇപ്പോള്‍ നാലുപതിറ്റാണ്ടായി ബഹ്‌റൈനിലുള്ള മഹ്മൂദ് മുഹമ്മദലി മുസ്‌ല്യാരും കുടുംബവും ബഹ്‌റൈന്‍ പൗരത്വം നേടി സല്‍മാബാദിലാണ് താമസം.

കര്‍ണ്ണാടകയിലെ കുടക് സ്വദേശിയായ സഫിയ സുലൈമാനാണ് ദര്‍വീശിന്റെ മാതാവ്. സുമയ്യ (ദുബൈ), വസ്മിയ, മുഹമ്മദ് ജലാല്‍, ശരീഫ്, നൂറ, ഇമാദ് എന്നിവരാണ് സഹോദരങ്ങള്‍.
പ്രവാസിമലയാളികളുടെ നേതൃത്വത്തില്‍ ഇവിടെ പ്രവര്‍ത്തിക്കുന്ന സാസ്‌കാരിക സംഘടനയായ ഫജ്ര്‍ ദര്‍വീശിനെ അനുമോദിക്കുന്ന ഒരു ചടങ്ങും ഇഫ്താര്‍ സംഗമവും കഴിഞ്ഞ ദിവസം ഇവിടെ സംഘടിപ്പിച്ചിരുന്നു.